തിരുവനന്തപുരം : പബ്ലിക് സര്‍വീസ് കമ്മീഷന്മേലുള്ള ജനങ്ങളുടെ വിശ്വാസം പൂര്‍ണ്ണമായും നഷ്ടപ്പെട്ട സാഹചര്യത്തില്‍ പി എസ് സി പിരിച്ചുവിടാന്‍ മുഖ്യമന്ത്രി തയ്യാറാവണമെന്ന് ബിജെപി ദേശീയ നിര്‍വാഹക സമിതി അംഗം ശ്രീ പി കെ കൃഷ്ണദാസ്.പിണറായി സര്‍ക്കാരിന്റെ കാലത്ത് പിഎസ്സിയില്‍ നടന്ന എല്ലാ ക്രമക്കേടുകളെക്കുറിച്ചും സിബിഐ അന്വേഷണം പ്രഖ്യാപിക്കാന്‍ മുഖ്യമന്ത്രി വി ഡി സതീശന്‍ തയാറാവണമെന്നും കൃഷ്ണദാസ് വാര്‍ത്താ സമ്മേളനത്തില്‍ ആവശ്യപ്പെട്ടു.
ദല്‍ഹിയില്‍ പരീക്ഷ ക്രമക്കേടിനെതിരെ സമരം ചെയ്ത ഇടത് വലത് നേതാക്കള്‍ കേരളത്തിലെ പി എസ് സി വിഷയത്തില്‍ മൗനത്തിലാണ്. സെക്രട്ടേറിയറ്റിന് മുന്നില്‍ ഒരു മാസമായി സമരം ചെയ്യുന്ന ഉദ്യോഗര്‍ത്ഥികളെ ഇവര്‍ കാണുന്നില്ല.
പിഎസ്സിയെ മാര്‍ക്‌സിസ്റ്റ് പാര്‍ട്ടി കഴിഞ്ഞ പത്ത് വര്‍ഷത്തെ ഭരണം കൊണ്ട് സമ്പൂര്‍ണമായും നശിപ്പിച്ചിരിക്കുകയാണ്.സഹകരണ സ്ഥാപനങ്ങളില്‍ തങ്ങളുടെ ആളുകളെ തിരുകിക്കയറ്റിയത് പോലെ, പിഎസ്സിയിലും മാര്‍ക്‌സിസ്റ്റ് പാര്‍ട്ടി തങ്ങളുടെ കേഡര്‍മാരെയും നേതാക്കളുടെ ബന്ധുക്കളെയും നിയമവിരുദ്ധമായി നിയമിക്കുകയാണ്.
പ്രതിപക്ഷ നേതാവ് വി ഡി സതീശന്‍ മുന്‍പ് പിഎസ്സി ക്രമക്കേടുകള്‍ക്കെതിരെ നിയമസഭയില്‍ സംസാരിച്ചിരുന്നുവെങ്കിലും ഇപ്പോള്‍ മൗനം പാലിക്കുകയാണ്. പിണറായി വിജയനും വി ഡി സതീശനും തമ്മില്‍ നേരത്തെ ചില അന്തര്‍ധാരകള്‍ ഉണ്ടായിരുന്നു. കസേരയില്‍ മാറ്റം സംഭവിച്ചെങ്കിലും ആ അന്തര്‍ധാര ഇപ്പോഴും നിലനില്‍ക്കുകയാണെന്നും അദ്ദേഹം ആരോപിച്ചു.
നിലവിലെ ക്രൈംബ്രാഞ്ച് അന്വേഷണം ഏറ്റവും ഒടുവില്‍ നടന്നിട്ടുള്ള ക്രമക്കേടുകളെ കുറിച്ച് മാത്രമാണ്. ആ ക്രമക്കേടുകള്‍ മഞ്ഞുമലയുടെ ഒരു അറ്റം മാത്രമാണ്. വ്യാപകമായ സാമ്പത്തിക ഇടപാടുകള്‍ മാര്‍ക്‌സിസ്റ്റ് പാര്‍ട്ടിയും ഡിവൈഎഫ്‌ഐയും ഇതിന്റെ പേരില്‍ നടത്തിയിട്ടുണ്ടോ എന്നും അന്വേഷിക്കണം. കഴിഞ്ഞ 10 വര്‍ഷത്തെ എല്ലാ നിയമനങ്ങളും കേന്ദ്ര ഏജന്‍സി അന്വേഷിക്കണമെന്നും കൃഷ്ണദാസ് ആവശ്യപ്പെട്ടു.
