ന്യൂദൽഹി: ത്രിപുരയിൽ നിന്നുള്ള യുവാവിനെതിരെ വംശീയ അധിക്ഷേപം നടത്തിയ സംഭവത്തിൽ അന്വേഷണം നേരിടുന്ന ദൽഹി ആസ്ഥാനമായ കണ്ടന്റ് ക്രിയേറ്റർ അമീർ ഷോകീനെതിരെ കർശന നടപടിയുണ്ടാകുമെന്ന് കേന്ദ്ര പാർലമെന്ററികാര്യ മന്ത്രി കിരൺ റിജിജു. ദൽഹി, ത്രിപുര പോലീസുകൾ സംയുക്തമായി നടപടി സ്വീകരിക്കുമെന്നും പ്രതിയെ കനത്ത പാഠം പഠിപ്പിക്കുമെന്നും അദ്ദേഹം വ്യക്തമാക്കി.
ഷോകീൻ യുവാവിനെ വംശീയമായി അധിക്ഷേപിക്കുന്ന വീഡിയോ സമൂഹമാധ്യമങ്ങളിൽ പ്രചരിച്ചതോടെയാണ് വിവാദം ശക്തമായത്. സംഭവത്തിൽ വടക്കുകിഴക്കൻ സംസ്ഥാനങ്ങളിൽ വ്യാപക പ്രതിഷേധം ഉയർന്നു. രാഷ്‌ട്രീയ നേതാക്കളും സമൂഹമാധ്യമ ഉപയോക്താക്കളും ആരോപണങ്ങൾക്കെതിരെ രംഗത്തെത്തി.
‘എക്സ്’ (X) പ്ലാറ്റ്‌ഫോമിലെ പോസ്റ്റിലൂടെയാണ് റിജിജു സംഭവത്തെ അപലപിച്ചത്. ഔദ്യോഗിക പരാതി നൽകുന്നതിൽ കാലതാമസമുണ്ടായെങ്കിലും കുറ്റക്കാരനെന്ന് കണ്ടെത്തുന്നയാൾക്കെതിരെ നടപടിയുണ്ടാകുമെന്ന് അദ്ദേഹം പറഞ്ഞു. സമൂഹത്തിൽ ഇത്തരം പെരുമാറ്റങ്ങൾ കണ്ടില്ലെന്ന് നടിക്കുന്നതും സഹിച്ചുനിൽക്കുന്നതും വിദ്വേഷം വ്യാപിക്കാൻ കാരണമാകുമെന്ന് റിജിജു ചൂണ്ടിക്കാട്ടി.
സംഭവത്തിൽ ത്രിപുര പോലീസിനാണ് പരാതി നൽകിയിരിക്കുന്നത്. വംശീയ അധിക്ഷേപം, സൈബർ ഭീഷണിപ്പെടുത്തൽ, വടക്കുകിഴക്കൻ സംസ്ഥാനങ്ങളിലെ തദ്ദേശീയ ജനവിഭാഗങ്ങളെ അപമാനിക്കുന്ന പരാമർശങ്ങൾ എന്നിവയാണ് പരാതിയിലെ ആരോപണങ്ങൾ. അതേസമയം, സംഭവവുമായി ബന്ധപ്പെട്ട് തങ്ങൾക്ക് ഇതുവരെ പരാതിയൊന്നും ലഭിച്ചിട്ടില്ലെന്ന് ദൽഹി പോലീസ് അറിയിച്ചു. പ്രതിയെ കണ്ടെത്താനുള്ള ശ്രമങ്ങൾ തുടരുകയാണെന്നും സംഭവം നടന്ന സ്ഥലം സ്ഥിരീകരിക്കേണ്ടതുണ്ടെന്നും പോലീസ് വ്യക്തമാക്കി.
വടക്കൻ ദൽഹിയിലെ ബാര ഇലാക്കയിലാണ് ഷോകീൻ താമസിക്കുന്നതെന്നാണ് പോലീസ് നൽകുന്ന വിവരം. ആരോപണത്തിന് ഇരയായ യുവാവും ഇതുവരെ ദൽഹി പോലീസിനെ സമീപിച്ചിട്ടില്ലെന്നാണ് റിപ്പോർട്ട്. വിഷയത്തിൽ ദൽഹി പോലീസുമായി ഏകോപിപ്പിച്ച് പ്രവർത്തിക്കാൻ ത്രിപുര മുഖ്യമന്ത്രി മണിക് സാഹ സംസ്ഥാന പോലീസ് മേധാവിക്ക് നിർദേശം നൽകി. വടക്കുകിഴക്കൻ സംസ്ഥാനങ്ങളിൽ നിന്നുള്ളവർക്കെതിരായ വംശീയ അധിക്ഷേപങ്ങൾ സംബന്ധിച്ച ആശങ്കകൾ വീണ്ടും ഉയർത്തുന്നതാണ് സംഭവം.
ആരോപണത്തിൽ അന്വേഷണം നടത്തി ആവശ്യമായ നിയമനടപടികൾ സ്വീകരിക്കണമെന്നാണ് വിവിധ രാഷ്‌ട്രീയ പാർട്ടികളിലെ നേതാക്കൾ ആവശ്യപ്പെടുന്നത്.
