കൊച്ചി: വഖഫ് ഭൂമി തര്‍ക്കവുമായി ബന്ധപ്പെട്ട് നാളുകളായി പുകഞ്ഞുകൊണ്ടിരുന്ന മുനമ്പം വിഷയം വീണ്ടും പ്രതിഷേധങ്ങളിലേക്ക് വഴിമാറുന്നു. മുനമ്പത്തെ ഭൂമി വഖഫ് ബോര്‍ഡിന്റേതാണെന്ന പുതിയ വഖഫ് ബോര്‍ഡ് ചെയര്‍മാന്‍ എം.സി.മായിന്‍ ഹാജിയുടെ പ്രസ്താവനയാണ് പ്രദേശവാസികളെയും സമര സമിതികളെയും വീണ്ടും പ്രക്ഷോഭത്തിലേക്ക് നീങ്ങാൻ പ്രേരിപ്പിച്ചത്. മുസ്ലിം ലീഗ് വൈസ് പ്രസിഡന്റ് കൂടിയായ മായിന്‍ ഹാജിയുടെ നിലപാട് മുഖ്യമന്ത്രി വി.ഡി.സതീശന്‍ അടക്കമുള്ള യു.ഡി.എഫ് നേതാക്കള്‍ സ്വീകരിച്ച മുന്‍ നിലപാടുകള്‍ക്ക് കേവലം വിരുദ്ധമാണ്. ഇത് യുഡിഎഫിനെ സാമുദായികമായും രാഷ്‌ട്രീയമായും വലിയ പ്രതിരോധത്തിലാക്കിയിട്ടുണ്ട്.
മുനമ്പം ഭൂസംരക്ഷണ സമിതിയുടെ നേതൃത്വത്തില്‍ അടുത്ത ദിവസം മുനമ്പത്ത് വിപുലമായ പ്രതിഷേധ ജാഥ സംഘടിപ്പിക്കാനും തീരുമാനിച്ചിട്ടുണ്ട്. മുനമ്പം പള്ളിയില്‍ നിന്ന് മെഴുകുതിരികള്‍ തെളിയിച്ച് ബീച്ചിലെ മുനമ്പം ഗ്യാപ്പില്‍ എത്തി പ്രാര്‍ത്ഥന നടത്തുന്ന തരത്തിലാണ് ഈ പ്രതിഷേധം ആസൂത്രണം ചെയ്തിട്ടുള്ളത്. പ്രദേശവാസികള്‍ക്ക് തങ്ങളുടെ ഭൂമിയുടെ കരമടയ്‌ക്കാന്‍ റവന്യൂ വകുപ്പ് അനുമതി നല്‍കിയതിനെ തുടര്‍ന്നാണ് കഴിഞ്ഞ ഒരു വര്‍ഷമായി മുനമ്പത്തെ പരസ്യ പ്രക്ഷോഭങ്ങള്‍ താല്‍ക്കാലികമായി നിര്‍ത്തിവെച്ചിരുന്നത്.
എന്നാല്‍ പുതിയ വെളിപ്പെടുത്തലുകള്‍ വന്നതോടെ കാര്യങ്ങള്‍ വീണ്ടും സങ്കീര്‍ണ്ണമായി. മുമ്പ് നടന്ന സമരത്തില്‍ നിന്ന് വേര്‍പിരിഞ്ഞ് ബി.ജെ.പി ആഭിമുഖ്യത്തോടെ രൂപീകരിച്ച മുനമ്പം സമരസമിതിയും വീണ്ടും രംഗത്തിറങ്ങിയിട്ടുണ്ട്. കേന്ദ്ര സര്‍ക്കാരിന്റെ പുതിയ വഖഫ് നിയമഭേദഗതിക്ക് ശേഷവും മുനമ്പത്തെ ഭൂമി മുന്‍ ഇടതുപക്ഷ വഖഫ് ബോര്‍ഡ് ഉമീദ് പോര്‍ട്ടലില്‍ രജിസ്റ്റര്‍ ചെയ്തത് ഇടതുപക്ഷത്തിനും വിനയായിട്ടുണ്ട്.
രാജ്യത്തെ വഖഫ് സ്വത്തുക്കളുടെ ആധികാരികത പരിശോധിക്കാന്‍ കേന്ദ്ര ന്യൂനപക്ഷ മന്ത്രാലയം തുടങ്ങിയതാണ് ഉമീദ് പോര്‍ട്ടല്‍.ഉമീദ് പോര്‍ട്ടലില്‍ മുനമ്പം ഭൂമി രജിസ്റ്റര്‍ ചെയ്തതിന് പിന്നില്‍ വന്‍ ഗൂഢാലോചന നടന്നിട്ടുണ്ടെന്ന് മുനമ്പം സമരസമിതി ചെയര്‍മാന്‍ ഫിലിപ്പ് ജോസഫ് ആരോപിക്കുന്നു
