പത്തനംതിട്ട: സമൂഹമാധ്യമങ്ങള്‍ വഴി അപകീര്‍ത്തിപ്പെടുത്തിയെന്ന പരാതിയില്‍ കോണ്‍ഗ്രസ് പത്തനംതിട്ട ജില്ലാ പഞ്ചായത്ത് അംഗം ശ്രീനാദേവി കുഞ്ഞമ്മയ്‌ക്കെതിരെ പൊലീസ് കേസ്. സിപിഎം സംസ്ഥാന കമ്മിറ്റിയംഗം കെ പി ഉദയഭാനുവിന്റെ പരാതിയില്‍ അടൂര്‍ പൊലീസ് ആണ് കേസെടുത്തത്.
പൊതുപ്രവര്‍ത്തനത്തെ അപകീര്‍ത്തിപ്പെടുത്തി, ലൈംഗിക അരാജകത്വത്തോടെ ജീവിക്കുന്ന ആളാണെന്ന് വരുത്തി തീര്‍ക്കാന്‍ ശ്രമിച്ചു എന്നിങ്ങനെയാണ് എഫ്‌ഐആറില്‍ പറയുന്നത്.രാഹുല്‍ മാങ്കൂട്ടത്തിലിനെ കെ പി ഉദയഭാനു വിമര്‍ശിച്ചതിനെ തുടര്‍ന്നാണ് ശ്രീനാദേവിയുടെ വിവാദമായ ഫേസ്ബുക്ക് പോസ്റ്റ്. സിപിഐ വിട്ട് കോണ്‍ഗ്രസില്‍ ചേക്കേറിയതാണ് ശ്രീനാദേവി കുഞ്ഞമ്മ.
ശ്രീനാദേവി കുഞ്ഞമ്മയ്‌ക്കെതിരെ നിയമനടപടി സ്വീകരിക്കുമെന്ന് കെ പി ഉദയഭാനു പറഞ്ഞു. 1979 ല്‍ താന്‍ പഞ്ചായത്ത് പ്രസിഡന്റായപ്പോള്‍ ശ്രീനദേവി ജനിച്ചിട്ടില്ല. എന്നിട്ടാണ് അപ്പോഴത്തെ കാര്യം നേരിട്ടറിയാമെന്ന് പറയുന്നത്. ഇങ്ങനെയൊക്കെ പറഞ്ഞിട്ട് ശ്രീനാദേവി കുഞ്ഞമ്മയ്‌ക്ക് ഒരു ജീവിതം കിട്ടുകയാണെങ്കില്‍ കിട്ടട്ടെ എന്നും അദ്ദേഹം പരിഹസിച്ചു.
