ദൽഹി: മുഖ്യതെരഞ്ഞെടുപ്പ് കമ്മീഷൻ ഗ്യാനേഷ് കുമാറിന്റെ രാജി ആവശ്യപ്പെട്ടുകൊണ്ടുള്ള പാറ്റ സമരത്തിന് തിരശ്ശീല വീഴുന്നു. ഡൽഹി നിവാസികളുടെയും കച്ചവടക്കാരുടെയും എതിർപ്പുകൾ തിരിച്ചടിയായതോടെ സമരത്തിന് ആളില്ലാതായി.ഇതോടെ സമരം താൽക്കാലികമായി നിര്ത്തുന്നു എന്ന് സിജെപി നേതാവ് അഭിജിത് ദീപ്‌കേ.
‘പ്രതിഷേധങ്ങളുടെയും സംഘർഷങ്ങളുടെയും പശ്ചാത്തലത്തിൽ എല്ലാവരുടെയും കുടുംബം ആശങ്കയിലാണ്. പൂജ ആഘോഷങ്ങൾ നടക്കുകയാണ്. സമരക്കാർ തങ്ങളെ സ്‌നേഹിക്കുന്നവർക്കൊപ്പം നിൽക്കണമെന്നും എക്‌സിൽ കുറിച്ച പോസ്റ്റിൽ പറയുന്നു. കോക്രോച്ച് ജനതാ പാർട്ടി (സിജെപി) നേതാക്കളായ സൗരവ് ദാസ്, അശുതോഷ് റാങ്ക് എന്നിവർക്ക് ജാമ്യം നിഷേധിക്കുകയും അവരെ ജയിലിലേക്ക് അയച്ചതിന്റെയും പശ്ചാത്തലത്തിലാണ് ദിപ്‌കെയുടെ പോസ്റ്റ്.
തീഹാർ ജയിലിൽ കഴിയുന്ന രണ്ട് സിജെപി നേതാക്കളെയും, സമാധാന ബോണ്ട് ലംഘിച്ചതിനും പ്രതിഷേധ പ്രദേശമല്ലാതായി പ്രഖ്യാപിച്ച ജന്തർമന്തറിലേക്ക് അതിക്രമിച്ചു കയറിയെന്നാരോപിച്ചുമാണ് ഒക്ടോബർ 14ന് അഞ്ച് ദിവസത്തെ ജുഡീഷ്യൽ കസ്റ്റഡിയിൽ വിട്ടത്.മുഖ്യ തിരഞ്ഞെടുപ്പ് കമ്മീഷണര്‍ ഗ്യാനേഷ് കുമാർ രാജി വെക്കണമെന്ന് ആവശ്യപ്പെട്ട് മുദ്രാവാക്യം വിളിച്ചുകൊണ്ട്, അനുമതിയില്ലാതെ ബാരിക്കേഡുകൾ തകർത്ത് ജന്തർമന്തർ പ്രദേശത്തേക്ക് പ്രവേശിക്കാൻ ശ്രമിച്ചതിനെ തുടർന്ന് ചൊവ്വാഴ്ച രാവിലെയാണ് ഇവരെ കസ്റ്റഡിയിലെടുത്തത്.
അതിക്രമിച്ചു കടക്കൽ, നിരോധനാജ്ഞ ലംഘനം, സമാധാന ബോണ്ട് ലംഘനം, ഔദ്യോഗിക കൃത്യനിർവഹണത്തിൽ ഏർപ്പെട്ടിരുന്ന പൊതുപ്രവർത്തകനെ തടസ്സപ്പെടുത്തൽ തുടങ്ങിയ കുറ്റങ്ങൾ ചുമത്തിയാണ് സിജെപി പ്രവർത്തകർക്കെതിരെ പോലീസ് കേസെടുത്തിരിക്കുന്നതെന്ന് വൃത്തങ്ങൾ അറിയിച്ചു.
ശനിയാഴ്ച നടന്ന പ്രതിഷേധത്തിനിടയിൽ കസ്റ്റഡിയിലെടുത്തതിന് ശേഷം ദാസും റാങ്കും ഒരു വർഷത്തേക്ക് സമാധാനം പാലിക്കാമെന്ന് കാണിച്ച് ബോണ്ടുകളിൽ ഒപ്പുവെച്ചിരുന്നുവെന്നും അവർ പറഞ്ഞു. ചീഫ് ഇലക്ഷൻ കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ടും വോട്ടർ പട്ടികയിലെ പ്രത്യേക തീവ്ര പുനരവലോകനത്തിലെ ക്രമക്കേടുകൾക്കെതിരെയും സിജെപിയും മറ്റ് സംഘടനകളും നടത്തിയ തുടർച്ചയായ പ്രതിഷേധങ്ങളെ തുടർന്ന് ദേശീയ തലസ്ഥാനത്ത് സുരക്ഷ ശക്തമാക്കിയ പശ്ചാത്തലത്തിലാണ് ഈ നടപടി.
