മുംബൈ: സ്ലീപ്പർ ടിക്കറ്റുമായി എസി കോച്ചിൽ കയറിഎഎസ്ഐയെ ബ്ലേഡ് കൊണ്ട് ആക്രമിച്ച നടി അന്തര ബാനർജിയെ റെയിൽവേ പോലീസ് അറസ്റ്റ് ചെയ്തു. ട്രെയിൻ യാത്രയ്ക്കിടെ ഉദ്യോഗസ്ഥരെ ബ്ലേഡ് കൊണ്ട് ആക്രമിച്ച് ഭീകരാന്തരീക്ഷം സൃഷ്ടിച്ച മോഡലും വെബ് സീരീസ് നടിയുമായ അന്തര ബാനർജിയെ റെയിൽവേ പോലീസ് അറസ്റ്റ് ചെയ്തു. മുംബൈയിൽ നിന്ന് സൂറത്തിലേക്ക് പോവുകയായിരുന്ന ആരവല്ലി എക്സ്പ്രസിലാണ് നാടകീയമായ സംഭവങ്ങൾ അരങ്ങേറിയത്.
സ്ലീപ്പർ ടിക്കറ്റുമായി എസി കോച്ചിൽ കയറിപ്പറ്റിയ നടി, സീറ്റ് ഒഴിയാൻ യാത്രക്കാർ ആവശ്യപ്പെട്ടതോടെയാണ് വലിയ പ്രശ്നങ്ങൾക്ക് തുടക്കമിട്ടത്. യാത്രക്കാരുടെ പരാതിയെത്തുടർന്ന് ടിടിഇ വിവരമറിയിച്ചതനുസരിച്ച് എത്തിയ ആർപിഎഫ് ഉദ്യോഗസ്ഥർക്ക് നേരെ ഇവർ അസഭ്യവർഷം നടത്തുകയായിരുന്നു. തുടർന്ന് സ്വന്തം വസ്ത്രങ്ങൾ അഴിച്ചുമാറ്റി, കൈവശമുണ്ടായിരുന്ന റേസർ ബ്ലേഡ് ഉപയോഗിച്ച് എഎസ്ഐയെ വെട്ടിപ്പരിക്കേൽപ്പിച്ചു.
അക്രമത്തിനിടയിൽ സ്വയം മുറിവേൽപ്പിക്കുകയും പോലീസുകാരുടെ ഫോണും യൂണിഫോമും നശിപ്പിക്കുകയും ചെയ്ത നടി ട്രെയിനിന്റെ ചില്ലുകൾ തകർത്ത് രക്ഷപ്പെടാനും ശ്രമം നടത്തി. ഏകദേശം ഒരു മണിക്കൂറോളം ട്രെയിനിൽ ഭീതി പരത്തിയ നടിയെ ഒടുവിൽ ദഹാനു റെയിൽവേ സ്റ്റേഷനിൽ വെച്ച് അതീവ പണിപ്പെട്ടാണ് റെയിൽവേ പോലീസ് കീഴ്പ്പെടുത്തിയത്.
എസി കോച്ചിൽ ടിക്കറ്റ് കിട്ടാത്തതിലുള്ള കടുത്ത ദേഷ്യത്തിലാണ് താൻ ഇതെല്ലാം ചെയ്തതെന്നാണ് ചോദ്യം ചെയ്യലിൽ ഇവർ പോലീസിനോട് പറഞ്ഞത്. പൊതുസ്ഥലത്ത് വൻ അക്രമം അഴിച്ചുവിട്ട നടിക്കെതിരെ കർശന വകുപ്പുകൾ ചുമത്തിയാണ് പോലീസ് കേസെടുത്തിരിക്കുന്നത്
