ആലപ്പുഴ : സംസ്ഥാനത്ത് ബിജെപി അക്കൗണ്ട് തുറക്കുമെന്ന് എസ് എന്‍ ഡി പി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍ . ഇന്ത്യ ഭരിക്കുന്ന പാര്‍ട്ടിയാണ് ബിജെപി. അവര്‍ അക്കൗണ്ട് തുറന്നാല്‍ പ്രശ്‌നമില്ല. തിരുത്തല്‍ ശക്തിയായി ഉണ്ടാകും.തിരുവനന്തപുരം ജില്ലയിലാവും ബിജെപി ജയമെന്ന് വെള്ളാപ്പള്ളി പറഞ്ഞു.
നിയമസഭാ തെരഞ്ഞെടുപ്പില്‍ എല്‍ഡിഎഫ് ജയിക്കണമെന്നാണ് ആഗ്രഹവും പ്രതീക്ഷയുമെന്നും വെളളാപ്പളളി നടേശന്‍ പ്രതികരിച്ചു. ഇങ്ങനെ പറയാന്‍ തനിക്ക് തന്റേതായ കാരണങ്ങളുണ്ട്. സത്യസന്ധമായ കാര്യങ്ങളാണ് പറഞ്ഞതെന്നും അതില്‍ ആരും പരിഭവം കാണണ്ടെന്നും വെള്ളാപ്പള്ളി നടേശന്‍ പറഞ്ഞു. എല്‍ഡിഎഫ് ഒരുപാട് കാര്യങ്ങള്‍ ചെയ്തു. അവര്‍ നേരിയ ഭൂരിപക്ഷത്തില്‍ ജയിക്കും.യുഡിഎഫ് ഭരണത്തില്‍ വന്നാല്‍ കലഹം ഉറപ്പാണ്. ഭരണം കിട്ടുമെന്ന് തോന്നിയപ്പോള്‍ ഇതാണ് അവസ്ഥയെന്നും വെളളാപ്പളളി പറഞ്ഞു.
തുടര്‍ച്ചയായ 10 വര്‍ഷത്തെ ഭരണം എല്‍ഡിഎഫിന്റെ താഴെ തട്ടിലെ അണികളെ ആലസ്യത്തിലാക്കി. താഴെ തട്ടില്‍ ഇത്തവണ പ്രവര്‍ത്തനം ശക്തമല്ല. എല്‍ഡിഎഫ് വന്നാല്‍ മുഖ്യമന്ത്രി പിണറായി തന്നെയാകും.
വി ഡി സതീശന് വന വാസത്തിന് പോകരുത് . വി ഡി സതീശനുമായി വഴക്ക് ഇല്ല. സതീശന് കൊള്ളാവുന്ന രാഷ്‌ട്രീയനേതാവാണെന്ന് വെള്ളാപ്പള്ളി കൂട്ടിച്ചേര്‍ത്തു. വി ഡി സതീശന് മുസ്ലീം ലീഗ് പിന്തുണ നല്‍കിയത് സംബന്ധിച്ച്, കോണ്‍ഗ്രസിന് ഹൈക്കമാന്‍ഡ് ഇല്ലേയെന്ന് ചോദിച്ച അദേഹം പാണക്കാട് കോണ്‍ഗ്രസിന്റെ ഹൈക്കമാന്‍ഡ് ആകുന്നുവെന്ന് വിമര്‍ശിച്ചു.
