ക്വാലലംപൂര്:: ആദര്ശതത്വങ്ങള് ചിലയിടത്ത് മാത്രം നടപ്പാക്കുക എന്നത് ഇന്നത്തെ ലോകത്തിന്റെ രീതിയായി മാറിക്കഴിഞ്ഞെന്ന് യുഎസിനെയും യൂറോപ്പിനെയും വിമര്ശിച്ച് വിദേശകാര്യമന്ത്രി ജയശങ്കര്. പ്രസംഗിക്കുന്നത് പലപ്പോഴും പലരും പ്രാവര്ത്തികമാക്കുക പതിവില്ലെന്നും ജയശങ്കര് പരിഹസിച്ചു.
റഷ്യയില് നിന്നും എണ്ണയും മറ്റു ആവശ്യമുള്ള ചരക്കുകളും വാങ്ങുന്ന യുഎസും യൂറോപ്പും പക്ഷെ ഇന്ത്യയെ ഉള്പ്പെടെയുള്ള രാജ്യങ്ങള് റഷ്യന് എണ്ണ വാങ്ങുന്നതിനെ അനുകൂലിക്കുന്നില്ല. ജനങ്ങളുടെ ഊര്ജ്ജസുരക്ഷയെ കരുതി റഷ്യയില് നിന്നും എണ്ണ വാങ്ങാന് മുതിരുന്ന ഇന്ത്യയെപ്പോലുള്ള രാജ്യങ്ങളെ അതില് നിന്നും തടയുന്ന യുഎസിനെയും യൂറോപ്യന് യൂണിയന് രാജ്യങ്ങളെയും ജയശങ്കര് ശക്തമായി വിമര്ശിച്ചു. .
ഭീകരവാദത്തിനെതിരെ പ്രതിരോധിക്കാനുള്ള ഇന്ത്യയുടെ അവകാശത്തില് യാതൊരുവിട്ടുവീഴ്ചയും അനുവദിക്കില്ലെന്നും ജയശങ്കര് പറഞ്ഞു. 20ാമത് ഈസ്റ്റ് എഷ്യാ ഉച്ചകോടിയില് പങ്കെടുത്ത് സംസാരിക്കവേയാണ് ജയശങ്കര് ഇന്ത്യയുടെ നയം വ്യക്തമാക്കിയത്.
ഭീകരവാദം ഒരു തുടര്ച്ചയായതും ലോകത്തെ കാര്ന്നുതിന്നുന്നതുമായ ഭീഷണിയാണെന്നും ഇതിനെതിരെ വിട്ടുവീഴ്ചയില്ലാത്ത നിലപാട് കൈക്കൊള്ളണമെന്നും ജയശങ്കര് സമ്മേളനത്തില് പങ്കെടുക്കുന്ന ലോകനേതാക്കളോട് ആഹ്വാനം ചെയ്തു.
രാജ്യങ്ങള് തമ്മിലുള്ള സംഘര്ഷങ്ങള് ലോകത്തെ പല രീതിയില് തകര്ക്കുകയാണ്. ഞങ്ങള്ക്കും ഈയിടെ അത്തരമൊരു സാഹചര്യമുണ്ടായെന്ന് ഇന്ത്യാ-പാക് യുദ്ധത്തെ സൂചിപ്പിച്ചുകൊണ്ട് ജയശങ്കര് പറഞ്ഞു. അത് മനുഷ്യന് വലിയ ദുരിതങ്ങള് നല്കുന്നുവെന്ന് മാത്രമല്ല, രാജ്യത്തിന്റെ ഭക്ഷ്യ സുരക്ഷയെ വരെ ബാധിച്ചു. ഊര്ജ്ജത്തിന്റെ സ്വതന്ത്രമായ ഒഴുക്കിനെ തടസ്സപ്പെടുത്തി. വ്യാപാരത്തെ തകര്ത്തു. അതുകൊണ്ടാണ് ഇന്ത്യ ഗാസ സമാധാന പദ്ധതിയെ സ്വാഗതം ചെ്യതത്. അതുപോലെ ഉക്രൈനുമായുള്ള റഷ്യയുടെ യുദ്ധത്തിലും എത്രയും വേഗം പരിഹാരം കാണണമെന്ന് ഇന്ത്യ അഗ്രഹിക്കുന്നു. -ജയശങ്കര് അഭിപ്രായപ്പെട്ടു.
