തിരുവനന്തപുരം : പൊലീസ് ക്വാര്‍ട്ടേഴ്സിലെ ശുചിമുറിയില്‍ അബോധാവസ്ഥയില്‍ കാണപ്പെട്ട 13കാരിയുടെ ദുരൂഹ മരണത്തില്‍ സി.ബി.ഐ അന്വേഷണം നടത്താന്‍ ഹൈക്കോടതി ഉത്തരവ്. പൊലീസ് അന്വേഷണം തുടങ്ങി എട്ടു മാസമായിട്ടും പ്രതിയെ പിടികൂടാത്തതിനാലാണ് കേസ് സി.ബി.ഐയെ ഏല്‍പ്പിക്കാന്‍ കോടതി ഉത്തരവിട്ടത്.
അന്വേഷണം വേഗത്തില്‍ ഏറ്റെടുക്കണമെന്നും സി.ബി.ഐയ്‌ക്ക് കോടതി നിര്‍ദ്ദേശം നല്‍കി .കുട്ടി തുടര്‍ച്ചയായി പീഡനത്തിന് ഇരയായെന്ന പോസ്റ്റ്മോര്‍ട്ടം റിപ്പോര്‍ട്ട് കൂടി കണക്കിലെടുത്താണ് കേസ് സി.ബി.ഐക്ക് വിടാന്‍ കോടതി ഉത്തരവിട്ടത്. കുട്ടിയുടെ അമ്മ നല്‍കിയ ഹര്‍ജിയാണ് കോടതി പരിഗണിച്ചത്.
2023 മാര്‍ച്ച് 29നാണ് പെണ്‍കുട്ടിയെ പൊലീസ് ക്വാര്‍ട്ടേഴ്സിലെ ശുചിമുറിയില്‍ അബോധാവസ്ഥയില്‍ കണ്ടത്. തിരുവനന്തപുരം മെഡിക്കല്‍ കോളേജില്‍ എത്തിച്ചെങ്കിലും മൂന്ന് ദിവസം കഴിഞ്ഞ ഏപ്രില്‍ ഒന്നിന് ആശുപത്രിയില്‍ വച്ച് പെണ്‍കുട്ടി മരിച്ചു.
പൊലീസ് ക്വാര്‍ട്ടേഴ്സില്‍ രക്ഷിതാക്കള്‍ക്കൊപ്പമാണ് പെണ്‍കുട്ടി താമസിച്ചിരുന്നത്.
