കൊല്ലം: പോത്തന്‍കോട് അച്ഛനും മകള്‍ക്കും നേരെ ആക്രമണമുണ്ടായ കേസില്‍ ഗുണ്ടാസംഘം പിടിയില്‍. പ്രതികള്‍ ഒളിവില്‍ കഴിഞ്ഞിരുന്ന കരുനാഗപ്പള്ളിയിലെ ലോഡ്ജില്‍ നിന്നും ഇവരെ പോലീസ് പിടികൂടുകയായിരുന്നു. ഫൈസല്‍ എന്നാ ഗുണ്ടാസംഘമാണ് പിടിയിലായത്.
സംഭവത്തിന് ശേഷം ഒളിവില്‍ പോയ പ്രതികള്‍ക്കായി പോലീസ് തെരച്ചില്‍ നടത്തി വരികയായിരുന്നു. അതിനിടെ പ്രതികള്‍ ഒളിവില്‍ താമസിച്ചിരുന്ന സ്ഥലത്തെ കുറിച്ച് വിവരം ലഭിച്ചതിനെ തുടര്‍ന്ന് പോലീസെത്തി അറസ്റ്റ് ചെയ്യുകയായിരുന്നു. ഞായറാഴ്ച പുലര്‍ച്ചെയാണ് കരുനാഗപ്പള്ളി പോലീസ് ലോഡ്ജിലെത്തി പ്രതികളെ കസ്റ്റഡിയിലെടുത്തത്. ഇവരെ കരുനാഗപ്പള്ളി പോലീസ് സ്റ്റേഷനില്‍ എത്തിച്ചിട്ടുണ്ട്. ഇവരെ തിരുവനന്തപുരത്തേക്ക് കൊണ്ടുപോകും.
കാര്‍ യാത്രക്കാരായ വെഞ്ഞാറമൂട് വയ്യേറ്റ് ഇടവിളാകത്ത് വീട്ടില്‍ ഷെയ്‌ക്ക് മുഹമ്മദ് (46) എന്ന ഷാ, മകള്‍ എന്നിവര്‍ക്കു നേരേ കഴിഞ്ഞ ദിവസമാണ് നാലംഗ ഗുണ്ടാസംഘത്തിന്റെ ആക്രമണം ഉണ്ടായത്. ബുധനാഴ്ച രാത്രി 8.30-ന് പോത്തന്‍കോട് ജങ്ഷന് സമീപമായിരുന്നു സംഭവം. നാലംഗ സംഘം സഞ്ചരിച്ച കാറിനെതിരേ ഷായുടെ കാര്‍ വന്നുവെന്നാരോപിച്ചായിരുന്നു ആക്രമണം ഉണ്ടായത്. ഹോട്ടലില്‍നിന്നു ഭക്ഷണം കഴിച്ച ശേഷം നാലംഗ സംഘം കാറില്‍ റോഡ് മുറിച്ചുകടക്കാന്‍ ശ്രമിക്കുന്നതിനിടെയാണ് ശ്രീകാര്യം ഭാഗത്തുനിന്നും ഷായും മകളും സഞ്ചരിച്ച കാര്‍ ഇവരുടെ കാറിനടുത്ത് എത്തിയത്. കാറിന് റോഡ് മുറിച്ചു കടക്കാന്‍ ഷാ സഞ്ചരിച്ച കാര്‍ പിറകോട്ടെടുക്കാന്‍ പറഞ്ഞെങ്കിലും പുറകെ മറ്റു വാഹനങ്ങളുള്ളതിനാല്‍ കഴിഞ്ഞില്ല.
കാര്‍ പുറകോട്ടെടുക്കാത്തതില്‍ പ്രകോപിതരായ ഗുണ്ടാ സംഘം ആദ്യം ഷായെ ആക്രമിക്കുകയായിരുന്നു. വാപ്പയെ അടിക്കരുതെന്ന് മകള്‍ കരഞ്ഞു പറഞ്ഞെങ്കിലും അവര്‍ മര്‍ദ്ദിക്കുകയായിരുന്നു. തുടര്‍ന്ന് പെണ്‍കുട്ടിക്കു നേരേയായി ആക്രമണം. കാറില്‍ പെണ്‍കുട്ടിയിരുന്ന വശത്ത് വന്ന് അസഭ്യം പറയുകയും തോളിലും മുടിയിലും പിടിച്ചതായും പരാതിയില്‍ പറയുന്നു.
ഇതേ സംഘംതന്നെ അതേദിവസം ഏതാനും യുവാക്കളെയും ആക്രമിച്ചിരുന്നു. പോത്തന്‍കോടുള്ള ബാറിന് മുന്നിലെത്തി പ്രശ്‌നങ്ങളുണ്ടാക്കിയ സംഘം യുവാവിന്റെ തലയില്‍ ബിയര്‍കുപ്പികൊണ്ട് അടിച്ചു. നാല് ബിയര്‍ കുപ്പി തലയില്‍ അടിച്ചുപൊട്ടിച്ച് അതിക്രൂരമായാണ് ഗുണ്ടാ സംഘം യുവാവിനെ ആക്രമിച്ചത്. ഇതിനുശേഷം നെഞ്ചിന് താഴെ കുപ്പി കുത്തിയിറക്കുകയും ചെയ്തു. ഗുരുതരമായി പരിക്കേറ്റ യുവാവ് തിരുവനന്തപുരം മെഡിക്കല്‍ കേളേജില്‍ ചികിത്സയിലാണ്.
