തിരുവനന്തപുരം: ബിജെപി സംസ്ഥാന കമ്മിറ്റി ഓഫീസ് ആക്രമിച്ച സിപിഎം ഗുണ്ടകളുടെ പേരിലുള്ള കേസ് പിന്വലിക്കാനുള്ള സംസ്ഥാന സര്ക്കാരിന്റെ തീരുമാനം അങ്ങേയറ്റം ജനാധിപത്യവിരുദ്ധമാണെന്ന് ബിജെപി സംസ്ഥാന അധ്യക്ഷന് കെ.സുരേന്ദ്രന് പറഞ്ഞു.
ഭരണത്തിന്റെ തണലില് ഒരു ദേശീയ പാര്ട്ടിയുടെ സംസ്ഥാന ഓഫീസ് ആക്രമിച്ച് അന്നത്തെ സംസ്ഥാന അധ്യക്ഷന് കുമ്മനം രാജശേഖരനെ വധിക്കാന് ശ്രമിച്ച സംഭവം കേരളത്തെ ഞെട്ടിച്ചതാണ്. ഇത് പിന്വലിക്കാനുള്ള നീക്കത്തെ ബിജെപി നിയമപരമായും രാഷ്ട്രീയമായും നേരിടും. ഡിവൈഎഫ്ഐ ഗുണ്ടാ നേതാവിനെ രക്ഷിക്കാനാണ് സര്ക്കാര് കേസ് പിന്വലിക്കുന്നതെന്നും കെ.സുരേന്ദ്രന് ആരോപിച്ചു.
അക്രമ രാഷ്ട്രീയത്തിന് സര്ക്കാര് തന്നെ ചൂട്ടുപിടിക്കുകയാണ്. സിപിഎമ്മിന് ഈ നാട്ടില് എന്തുമാകാമെന്ന ധാരണ ബിജെപി അനുവദിച്ചു തരില്ലെന്നും കെ.സുരേന്ദ്രന് വ്യക്തമാക്കി. 2017 ജൂലൈ 28നാണ് ബിജെപി സംസ്ഥാന കമ്മിറ്റി ഓഫിസിനുനേരെ ആക്രമണമുണ്ടായത്്. മുന് കോര്പറേഷന് കൗണ്സിലറും പാളയം ഏരിയ കമ്മിറ്റി സെക്രട്ടറിയുമായ ഐ.പി. ബിനു, എസ്എഫ്ഐ മുന് ജില്ലാ സെക്രട്ടറി പ്രിജില് സാജ് കൃഷ്ണ, ജെറിന്, സുകേശ് എന്നിവരാണ് കേസിലെ പ്രതികള്.
