പത്തനംതിട്ട: ശബരിമലയെ തകര്ക്കാന് ശ്രമിക്കുന്ന ഇടത് സര്ക്കാരിനുള്ള തിരിച്ചടി ഭക്തര് ലോകസഭാ തെരഞ്ഞെടുപ്പില് നല്കണമെന്ന് ഉത്തര്പ്രദേശ് മുഖ്യമന്ത്രി യോഗി ആദിത്യനാഥ് പറഞ്ഞു.
പത്തനംതിട്ട പാര്ലമെന്റ് മണ്ഡലം ബിജെപി ബൂത്ത്തല പ്രവര്ത്തകരുടെ യോഗം ജില്ലാ സ്റ്റേഡിയത്തില് ഉദ്ഘാടനം ചെയ്യുകയായിരുന്നു അദ്ദേഹം. സുപ്രീംകോടതി വിധിയെ മറയാക്കി വിശ്വാസത്തെ തകര്ക്കാനാണ് സംസ്ഥാന സര്ക്കാര് ശ്രമിക്കുന്നത്. എന്നാല് ആരൊക്കെ ശ്രമിച്ചാലും ശബരിമലയെ തകര്ക്കാനാകില്ല. ശബരിമലയിലെ ആചാരം സംരക്ഷിക്കാന് ഭക്തരും നാട്ടുകാരുടെ നടത്തിയ പ്രക്ഷോഭത്തെ അഭിനന്ദിക്കുന്നു. കേരളത്തില് ഭരണകൂടം ഭക്തരെ വേട്ടയാടുമ്പോള് ഉത്തര്പ്രദേശില് സര്ക്കാര് ഭക്തജനങ്ങളോടൊപ്പമാണ്. പ്രയാഗില് നടന്ന കുംഭമേളയില് ഈ വര്ഷം 21 കോടി ആളുകളാണ് പങ്കെടുത്തത്.
കേന്ദ്ര സംസ്ഥാന സര്ക്കാരുകള് തോളോട് തോള് ചേര്ന്ന് ആവശ്യമായ സൗകര്യങ്ങള് ഒരുക്കി. വിശ്വാസം സംരക്ഷിക്കാന് ബിജെപിക്ക് മാത്രമേ കഴിയൂ. വിശ്വാസം സംരക്ഷിക്കാന് നരേന്ദ്രമോദി സര്ക്കാര് വീണ്ടും അധികാരത്തില് വരണം. ശബരിമല വിഷയത്തില് രാജ്യത്തെ ബിജെപി പ്രവര്ത്തകര് മുഴുവന് അയ്യപ്പ ഭക്തരോടൊപ്പമുണ്ട്. മോദി സര്ക്കാരിന്റെ അഞ്ച് വര്ഷത്തെ ഭരണം കൊണ്ട് ഭാരതത്തെ വിശ്വഗുരു സ്ഥാനത്തേക്ക് ഉയര്ത്താന് കഴിഞ്ഞു. എല്ലാ വിഭാഗം ജനങ്ങളെയും ഒരുമിച്ച് നിര്ത്താനും എല്ലായിടത്തും വികസനം എത്തിക്കാനും കഴിഞ്ഞു. ഇക്കാര്യത്തില് ഗ്രാമമെന്നോ നഗരമെന്നോ വ്യത്യാസമില്ല. ഭാരതത്തെ തകര്ക്കാന് ശ്രമിക്കുന്ന ഒരു വിഭാഗം നരേന്ദ്രമോദിക്കെതിരെ ഒരുമിക്കുന്നു. അഴിമതി, തീവ്രവാദം, അരാജകത്വം തുടങ്ങിയവ ആഗ്രഹിക്കുന്നവരാണ് മോദിക്കെതിരെ ഒരുമിക്കുന്നത്. കേരളത്തില് സംഘടനാ പ്രവര്ത്തനം നടത്താന് ബിജെപി പ്രവര്ത്തകര്ക്ക് ദുഷ്കരമാണെന്ന് അറിയാം. ആത്മാര്ത്ഥമായ പ്രവര്ത്തനത്തിലൂടെ കേരളത്തില് നിന്നും എംപിമാരെ വിജയിപ്പിക്കാന് സാധിക്കുമെന്നും യോഗി ആദിത്യനാഥ് പറഞ്ഞു.
പത്തനംതിട്ടയില് നടന്ന സമ്മേളനത്തില് ബിജെപി സംസ്ഥാന ജനറല് സെക്രട്ടറി ശോഭാ സുരേന്ദ്രന് അദ്ധ്യക്ഷയായി. സംസ്ഥാന അദ്ധ്യക്ഷന് അഡ്വ. പി.എസ്. ശ്രീധരന് പിളള, ജനറല് സെക്രട്ടറിമാരായ എ.എന്. രാധാകൃഷ്ണന്, എം.ടി. രമേശ്, സെക്രട്ടറി സി. ശിവന്കുട്ടി തുടങ്ങിയവര് പ്രസംഗിച്ചു.
