കൊച്ചി : നടന് കലാഭവന് മണിയുടെ ദുരൂഹ മരണവുമായി ബന്ധപ്പെട്ട കേസില് ഏഴു പേരെ സിബിഐ നുണപരിശോധനയ്ക്കു വിധേയരാക്കും. മണിയുടെ സുഹൃത്തുക്കളായ നടന് ജാഫര് ഇടുക്കി, ജോബി സെബാസ്റ്റ്യന്, സാബുമോന്, സി.എ. അരുണ്, എം.ജി. വിപിന്, കെ.സി. മുരുകന്, അനില്കുമാര് എന്നിവരെയാണു നുണ പരിശോധനയ്ക്കു വിധേയരാക്കുന്നത്.
കേസന്വേഷണത്തിന്റെ മേല്നോട്ട ചുമതലയുള്ള എറണാകുളം ചീഫ് ജുഡീഷ്യല് മജിസ്ട്രേട്ട് കോടതിയില് ഇവര് ഏഴു പേരും കഴിഞ്ഞദിവസം നേരിട്ടു ഹാജരായി നുണ പരിശോധനയ്ക്കുള്ള സമ്മതം അറിയിച്ചു. നേരത്തേ സമ്മതപത്രം എഴുതി നല്കിയതിന്റെ അടിസ്ഥാനത്തില് സിബിഐ പരിശോധനയ്ക്കു കോടതിയുടെ അനുമതി തേടുകയായിരുന്നു.
മണിയുടെ മരണവുമായി ബന്ധപ്പെട്ട വിവരങ്ങള് പറഞ്ഞുകൊടുത്ത ശേഷം നുണപരിശോധനയ്ക്കു സമ്മതമാണോ എന്നു കോടതി ഏഴു പേരോടും ചോദിച്ചിരുന്നു. ഇവര് സമ്മതം അറിയിച്ചിരുന്നു. ഇതുമായി ബന്ധപ്പെട്ട സിബിഐയുടെ അപേക്ഷയില് കോടതി ഈ മാസം 12 നു വിധി പറയും.
കലാഭവന് മണിയെ 2016 മാര്ച്ച് അഞ്ചിനാണ് വീടിനു സമീപത്തെ വസതിയായ പാഡിയില് രക്തം ഛര്ദിച്ച് അവശനിലയില് കണ്ടെത്തിയത്. തുടര്ന്ന് എറണാകുളത്തെ സ്വകാര്യ ആശുപത്രിയിലെത്തിച്ചെങ്കിലും പിറ്റേന്നു മരിച്ചു. മരണവുമായി ബന്ധപ്പെട്ട് ദുരൂഹതയുണ്ടെന്ന് നിരവധി ആരോപണങ്ങള് ഉയരുകയും മണിയുമായി അടുപ്പം പുലര്ത്തിയ പലരെയും ലോക്കല് പോലീസും പിന്നീടു സിബിഐയും ചോദ്യം ചെയ്തിരുന്നു.
