ന്യൂദല്ഹി: സിക്കിമിലെ ആദ്യത്തേതും രാജ്യത്തിന്റെ നൂറാമത്തേതുമായ പോക്യാങ് വിമാനത്താവളം പ്രധാനമന്ത്രി നരേന്ദ്രമോദി ഉദ്ഘാടനം ചെയ്തു. ഒമ്പതു വര്ഷം നീണ്ട കാത്തിരിപ്പിനൊടുവിലാണ് സിക്കിമിന് സ്വന്തമായി വിമാനത്താവളമെന്ന സ്വപ്നം യാഥാര്ഥ്യമായത്.
സമുദ്രനിരപ്പില് നിന്നും 4,500 അടി ഉയത്തിലുള്ള വിമാനത്താവള നിര്മിതിക്ക് 600 കോടി രൂപയാണ് ചെലവ്്. 990 ഏക്കറിലുള്ള വിമാനത്താവളം തലസ്ഥാനമായ ഗാങ്ടോക്കില് നിന്നും 33 കീ.മി അകലയാണ്്. നേരത്തെ യാത്രികര് പശ്ചിമബംഗളിലെ ബഗ്ദോഗ്രയില് ഇറങ്ങി, 124 കീ.മീ താണ്ടിവേണം ഗാങ്ടോക്കിലെത്താന്.
ഒക്ടോബര് നാലിന് വ്യവസായികാടിസ്ഥാനത്തിലുള്ള സേവനം ആരംഭിക്കും. എടിസി ടവര്-കം- ഫയര് സ്റ്റേഷന്, യാത്രക്കാര്ക്കായി ടെര്മിനല് അത്യാധുനികമായ രണ്ട് സിഎഫ്ടി, തീവ്രത കൂടിയ റണ്വേ ലൈറ്റുകള് തുടങ്ങിയവ വിമാനത്താവളത്തിന്റെ സവിശേഷതകളാണെന്ന് സിക്കിം ചീഫ് സെക്രട്ടറി എ.കെ. ശ്രീവാസ്തവ അറിയിച്ചു.
3,000 സ്ക്വയര് മീറ്റര് ദൈര്ഘ്യമുള്ള ടെര്മിനലാണ് വിമാനത്താവളത്തിന്റേത്. പദ്ധതിയുടെ ഭാഗമായി നിര്മിച്ച റീഇന്ഫോര്സ്മെന്റ് മതിലിനുമാത്രം 80 മീറ്റര് ഉയരം വരും. ലോകത്തിലെ ഏറ്റവും പൊക്കം കൂടിയ മതിലാണിത്. എയര്പോര്ട്ട് അതോറിറ്റി ഓഫ് ഇന്ത്യ നിര്മിച്ച പോക്യോങ് വിമാനത്താവളം ഇന്ത്യ-ചൈന ബോര്ഡറില് നിന്നും 60 കീ.മീ അകലെയാണ്.
30 മീറ്റര് വീതിയും 1.75 കിലോമീറ്റര് നീളവുമുള്ള റണ്വേയാണ് വിമാനത്താവളത്തിന്റേത്. രണ്ട് എടിആര്-72 വിമാനങ്ങള് നിര്ത്താന് കഴിയുന്ന, ചരക്കു കയറ്റാനുള്ള മേഖലയിലേക്ക് നയിക്കുന്ന 116 മീറ്റര് നീളമുള്ള ടാക്സിവേയുമുണ്ട്. കൂടാതെ 50 വാഹനങ്ങള്ക്ക് ഒരേസമയം പാര്ക്ക് ചെയ്യാനുള്ള സൗകര്യവും ഒരുക്കിയിട്ടുണ്ട്. വടക്കു കിഴക്കന് സംസ്ഥാനങ്ങളിലെ ആദ്യ ഗ്രീന്ഫീല്ഡ് വിമാനത്താവളമെന്ന ബഹുമതിയും ഇതോടെ സിക്കമിന് സ്വന്തമാകും. വിമാനത്താവളം യാഥാര്ഥ്യമായതോടെ സിക്കിമിലെ വിനോദസഞ്ചാരമേഖലയില് കുതിപ്പുണ്ടാകുമെന്നാണ് അധികൃതരുടെ പ്രതീക്ഷ.
