കോട്ടയം: രഞ്ജിനി സംഗീതസഭയുടെ നാല്‍പ്പതാം വാര്‍ഷികാഘോഷങ്ങള്‍ 13, 14 തീയതികളില്‍ തിരുനക്കര ശിവശക്തി ഓഡിറ്റോറിയത്തില്‍ നടക്കും. 13ന് രാവിലെ 9.30ന് മംഗളവാദ്യത്തോടെകൂടി ആഘോഷങ്ങള്‍ക്ക് തുടക്കമാകും. കലാപരിപാടികളുടെ ഉദ്ഘാടനം കെ.ജി. ജയന്‍ നിര്‍വ്വഹിക്കും. തുടര്‍ന്ന് നീലംപേരൂര്‍ കേശവപ്പണിക്കരുടെ സോപാന സംഗീതം അരങ്ങേറും. 11.30 മുതല്‍ നാഗസ്വരം, വയലിന്‍, ഫഌട്ട്, തവില്‍, മൃദംഗം, ഘടം എന്നിവ ചേര്‍ന്ന മ്യൂസിക് ഫ്യൂഷന്‍ നടക്കും. 1.30 മുതല്‍ രഞ്ജിനി സംഗീതസഭയിലെ വിദ്യാര്‍ത്ഥികള്‍ അവതരിപ്പിക്കുന്ന സംഗീതസദസ്സ്. തുടര്‍ന്ന് കുമാരി ദേവീകൃഷ്ണ വിജയ് അവതരിപ്പിക്കുന്ന നൃത്തം. അതിനുശേഷം അജിത് നമ്പൂതിരിയുടെ സംഗീതാസ്വാദന ക്ലാസ് എന്നിവ നടക്കും. വൈകിട്ട് 5.30ന് ചെന്നൈ പി. ഉണ്ണികൃഷ്ണന്റെ സംഗീതസദസ്സ്.
14ന് രാവിലെ 10ന് കുടമാളൂര്‍ മുരളീധരമാരാര്‍ അവതരിപ്പിക്കുന്ന സോപാനസംഗീതം. തുടര്‍ന്ന് സംഗീതാസ്വാദന ക്ലാസ്. ഉച്ചക്ക് 12.30 മുതല്‍ രഞ്ജിനി സംഗീതസഭയിലെ വിദ്യാര്‍ത്ഥിനികള്‍ അവതരിപ്പിക്കുന്ന സംഗീത സദസ്സ്. തുടര്‍ന്ന് കഥകളിപദക്കച്ചേരി. വൈകിട്ട് 5ന് പൊതുസമ്മേളനം ജസ്റ്റിസ് കെ. രാമകൃഷ്ണന്‍ ഉദ്ഘാടനം ചെയ്യും. വി.വി. കേശവന്‍ നമ്പൂതിരി അദ്ധ്യക്ഷത വഹിക്കും. തുടര്‍ന്ന് 6.30ന് ചലച്ചിത്രതാരം മിയ ജോര്‍ജ്ജ് അവതരിപ്പിക്കുന്ന നൃത്തം.
