കോട്ടയം: ഹിന്ദു എക്കണോമിക് ഫോറം കോട്ടയം ചാപ്റ്റര്‍ സംഘടിപ്പിക്കുന്ന ഓണം വ്യാപാരമേള 21ന് ആരംഭിക്കുമെന്ന് സംഘാടകര്‍ പത്രസമ്മേളനത്തില്‍ അറിയിച്ചു. തിരുനക്കര മൈതാനത്ത് 27 വരെ നടക്കുന്ന മേളയില്‍ ഗൃഹോപകരണങ്ങള്‍, വിവിധയിനം തുണിത്തരങ്ങള്‍, പച്ചക്കറി-പലവ്യഞ്ജനങ്ങള്‍, പൂക്കള്‍, ഗിഫ്റ്റ് ഐറ്റംസ് തുടങ്ങി അന്‍പതോളം സ്റ്റാളുകളുണ്ട്. ഇവകൂടാതെ പായസമേള, ഐസ്‌ക്രീം പാര്‍ലര്‍, ഉപ്പേരിക്കടകള്‍ എന്നിവയും മേളയോടനുബന്ധിച്ച് ഒരുക്കിയിട്ടുണ്ട്. എല്ലാദിവസവും രാവിലെ 10 മുതല്‍ വൈകിട്ട് 9 വരെയാണ് മേള നടക്കുന്നത്. എല്ലാദിവസവും വൈകുന്നേരങ്ങളില്‍ വിവിധ കലാപരിപാടികളും നടക്കും. 21ന് രാവിലെ 9ന് നഗരസഭാ ചെയര്‍മാന്‍ കെ.ആര്‍.ജി. വാര്യര്‍ വ്യാപാരമേള ഉദ്ഘാടനം ചെയ്യും. ബിജെപി ജില്ലാ പ്രസിഡന്റ് ഏറ്റുമാനൂര്‍ രാധാകൃഷ്ണന്‍, സിപിഎം ജില്ലാ സെക്രട്ടറി വി.എന്‍. വാസവന്‍, എച്ച്ഇഎഫ് സംസ്ഥാന പ്രസിഡന്റ് ടി. രാഘവമേനോന്‍ എന്നിവര്‍ ആശംസകളര്‍പ്പിക്കും. 27ന് രാവിലെ 10ന് നടക്കുന്ന സമാപനസമ്മേളനം മന്ത്രി തിരുവഞ്ചൂര്‍ രാധാകൃഷ്ണന്‍ ഉദ്ഘാടനം ചെയ്യും. ജില്ലാ പോലീസ് ചീഫ് എം.പി. ദിനേശ് സമ്മാനദാനം നിര്‍വ്വഹിക്കും. എച്ച്ഇഎഫ് സംസ്ഥാന ഓര്‍ഗനൈസര്‍ മനോജ് മേലേട്ട്, സംസ്ഥാന സെക്രട്ടറി ഡോ. വിനുകുമാര്‍ എന്നിവര്‍ ആശംസകളര്‍പ്പിക്കും.
പത്രസമ്മേളനത്തില്‍ കോട്ടയം ചാപ്റ്റര്‍ പ്രസിഡന്റ് എന്‍. വെങ്കിടകൃഷ്ണന്‍ പോറ്റി, സെക്രട്ടറി പി.ജെ. ഹരികുമാര്‍, ജനറല്‍ കണ്‍വീനര്‍ ജി. മോഹനചന്ദ്രന്‍, ട്രഷറര്‍ ഗോപാലകൃഷ്ണന്‍, പബ്ലിസിറ്റി കണ്‍വീനര്‍ ഷൈജു ലാല്‍ എന്നിവര്‍ പങ്കെടുത്തു.
