ന്യൂഡൽഹി : ഗോവയിൽ കോൺഗ്രസിന്റെ ‘ഗോയ് രഖോൺ യാത്ര’യിൽ പങ്കെടുത്തിന് പിന്നാലെ ലോക്‌സഭാ പ്രതിപക്ഷ നേതാവും കോൺഗ്രസ് നേതാവുമായ രാഹുൽ ഗാന്ധി വിദേശത്തേക്ക് പോയതിനെതിരെ സോഷ്യൽ മീഡിയയിൽ പരിഹാസം. വിയറ്റ്നാമിന്റെ തലസ്ഥാനമായ ഹനോയിയിലേക്കാണ് അദ്ദേഹം തിരിച്ചതെന്നാണ് സോഷ്യൽ മീഡിയയിലെ വിവിധ ക്ലിപ്പുകളിൽ അവകാശപ്പെടുന്നത്. എന്നാൽ രാഹുലിന്റെ വിദേശയാത്രയെക്കുറിച്ച് കോൺഗ്രസ് പാർട്ടി ഇതുവരെ ഔദ്യോഗികമായി ഒന്നും സ്ഥിരീകരിച്ചിട്ടില്ല.രാഹുൽ ഏത് വിദേശ യാത്ര ചെയ്താലും പാർട്ടി പ്രതികരിക്കാറില്ല.
രാജ്യത്ത് പ്രതിപക്ഷ നിരയിൽ പ്രതിഷേധങ്ങൾ ചൂടുപിടിക്കുമ്പോൾ ലോക്‌സഭാ പ്രതിപക്ഷ നേതാവ് വിദേശത്തേക്ക് പോയതിനെതിരെ ബിജെപി നേതാക്കളും പ്രവർത്തകരും കടുത്ത വിമർശനവുമായി രംഗത്തെത്തിയിട്ടുണ്ട്.രാഹുൽ ഗാന്ധി വീണ്ടും വിദേശയാത്രയിലാണെന്നും ഇത്തവണ വിയറ്റ്നാമിലേക്കാണ് പോയതെന്നും കാണിച്ച് നിരവധി ചിത്രങ്ങളും വീഡിയോകളുമാണ് സമൂഹമാധ്യമങ്ങളിൽ പ്രചരിക്കുന്നത്. ഒരു ഇൻസ്റ്റാഗ്രാം യൂസർ പങ്കുവെച്ച വീഡിയോയിൽ, “രാഹുൽ ഗാന്ധിക്കൊപ്പം ബിസിനസ് ക്ലാസിൽ വിയറ്റ്നാമിലേക്ക് യാത്ര ചെയ്യുന്നു” എന്ന് കുറിച്ചിരുന്നു.
ഈ ദൃശ്യങ്ങൾ വൈറലായതോടെ രാഷ്‌ട്രീയത്തിലെ രാഹുലിന്റെ ഗൗരവത്തെ ചോദ്യം ചെയ്ത് നിരവധി പേരാണ് രംഗത്തെത്തിയത്. “ഒരു സമരം നടത്തുക, ഒരാഴ്ചത്തേക്ക് അസ്ഥിരത സൃഷ്ടിക്കുക, തുടർന്ന് മാസങ്ങളോളം അവധിയെടുക്കുക – എല്ലാവരുടെയും സ്വപ്ന ജോലി! എന്നാൽ രാഹുൽ ഗാന്ധി എന്തിനാണ് ഏതാനും മാസങ്ങൾ കൂടുമ്പോൾ വിയറ്റ്നാമിൽ പോകുന്നത്? അവിടെ അദ്ദേഹം എന്ത് ചെയ്യുന്നു, ആരെയാണ് കാണുന്നത്?” എന്ന് ഒരു യൂസർ ചോദിച്ചു.
മറ്റൊരു യൂസർ കുറിച്ചത് ഇങ്ങനെ: “പുതിയ വർഷം 2025, മാർച്ച് 2025, പുതിയ വർഷം 2026, ഒക്ടോബർ 2026 എന്നിങ്ങനെ സമീപകാലത്ത് രാഹുൽ ഗാന്ധി വിയറ്റ്നാമിലേക്ക് നടത്തുന്ന നാലാമത്തെ രഹസ്യയാത്രയാണിത്. യാത്രകളെല്ലാം നീണ്ടതായിരുന്നു, എന്നാൽ കോൺഗ്രസ് യാതൊരു വിവരവും നൽകിയില്ല. ഇതൊരു ജോലിയോ, അവധിക്കാലമോ, അതോ ഇന്ത്യയെ അസ്ഥിരപ്പെടുത്താനുള്ള പദ്ധതിയോ?” ബിജെപിയുടെ ഔദ്യോഗിക സംസ്ഥാന ഹാൻഡിലുകളും ഈ വിഷയത്തിൽ പരിഹാസവുമായി എത്തി. “ഭരണമാറ്റത്തിനുള്ള പാഠങ്ങൾ പഠിക്കാൻ ഒരു വിദേശയാത്ര! പേര് രാഹുൽ ഗാന്ധി,” എന്ന് ബിജെപി അസം പരിഹസിച്ചു.
“ഭരണമാറ്റത്തിൽ ക്രാഷ് കോഴ്സിനായി വിയറ്റ്നാമിലേക്ക്! ഇവിടെ രാഷ്‌ട്രീയ നാടകങ്ങൾ നടക്കുമ്പോൾ അടുത്ത പാഠം വിദേശത്ത് കാത്തിരിക്കുന്നു,” എന്ന് ബിജെപി ആന്ധ്രാപ്രദേശും എക്സിൽ കുറിച്ചു. അഭിമുഖത്തിൽ ബിജെപി ദേശീയ വക്താവ് ആർ.പി. സിംഗ് പ്രതികരിച്ചത് ഇങ്ങനെയാണ്: “നോക്കൂ, രാഹുൽ ഗാന്ധി എപ്പോഴും ഇത് ചെയ്യുന്നുണ്ട്. ബിഹാറിൽ ഒരു യാത്ര നടത്തിയതിന് ശേഷം അദ്ദേഹം രണ്ട് മാസത്തേക്ക് വിദേശത്തേക്ക് അവധിക്കാലത്തിന് പോയി. അന്ന് അദ്ദേഹം വിയറ്റ്നാമിലേക്കാണ് പോയത്, ഒരുപക്ഷേ ഇത്തവണയും അദ്ദേഹം അവിടെക്ക് തന്നെയായിരിക്കും പോയിരിക്കുന്നത്.”
പ്രദീപ് ഭണ്ഡാരിയും പരിഹാസവുമായി രംഗത്തെത്തി: “രാഹുൽ ഗാന്ധി തനിക്ക് ഏറ്റവും നന്നായി അറിയാവുന്ന കാര്യം വീണ്ടും ചെയ്യുന്നു: ഒരു ഇടവേള എടുത്ത് അവധിക്കാലം ആസ്വദിക്കുന്നു! രാഹുൽ ഗാന്ധി ഇന്ത്യയിലില്ല! നവരാത്രി സമയത്ത് രാഹുൽ ഗാന്ധി എന്താണ് ചെയ്യുന്നത്? ഒരു ഇടവേള ആസ്വദിക്കുന്നു.”
