ന്യൂദല്‍ഹി: ഉത്തരഭാരതത്തില്‍ നിന്നടക്കം കൂടുതല്‍ സംസ്ഥാനങ്ങളില്‍ നിന്നും ശബരിമല മണ്ഡല- മകരവിളക്ക് തീര്‍ത്ഥാടനത്തിന് സ്‌പെഷല്‍ ട്രെയിനുകള്‍ അനുവദിക്കുമെന്ന് കേന്ദ്രറെയില്‍വേമന്ത്രി അശ്വനി വൈഷ്ണവ് ഉറപ്പ് നല്‍കിയതായി ബിജെപി ദേശീയ നിര്‍വാഹക സമിതി അംഗം പി.കെ. കൃഷ്ണദാസ് പറഞ്ഞു. ധന്‍ബാദ്- ആലപ്പുഴ എക്സ്പ്രസ് തിരുവനന്തപുരം വരെ നീട്ടിമെന്നും റെയില്‍വേ മന്ത്രിയെ ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖറിനൊപ്പം കണ്ട ശേഷം മാധ്യമങ്ങളോട് കൃഷ്ണദാസ് പറഞ്ഞു.
ദല്‍ഹി, മുംബൈ, ഗോവ, ഇന്‍ഡോര്‍, ജയ്‌പൂര്‍, വിശാഖപട്ടണം, ഹുബ്ലി തുടങ്ങിയ കേന്ദ്രങ്ങളില്‍ നിന്നും പ്രധാന സംസ്ഥാന തലസ്ഥാനങ്ങളില്‍ നിന്നും കൂടുതല്‍ സ്‌പെഷല്‍ ട്രെയിനുകള്‍ സര്‍വീസ് നടത്തും. ഹൈദരാബാദ്, സെക്കന്തരാബാദ് എന്നിവിടങ്ങളില്‍ നിന്ന് കൂടുതല്‍ ട്രെയിനുകള്‍ ഓടിക്കും. ചെങ്ങന്നൂര്‍, കോട്ടയം സ്റ്റേഷനു
കളില്‍ പ്രാഥമിക സൗകര്യങ്ങള്‍ യുദ്ധകാലാടിസ്ഥാനത്തില്‍ ഏര്‍പ്പെടുത്തും. സാങ്കേതിക പരിശോധന പൂര്‍ത്തിയാക്കി ധന്‍ബാദ് എക്സ്പ്രസ് തിരുവനന്തപു
രത്തേക്ക് നീട്ടും. ആലപ്പുഴ-കണ്ണൂര്‍ എക്‌സിക്യൂട്ടീവ് എക്സ്പ്രസ് കാസര്‍കോട്ടേക്ക് നീട്ടുന്നതും അംഗീകരിച്ചു. കണ്ണൂരില്‍ അവസാനിപ്പിക്കുന്ന പാസഞ്ചര്‍, മെമു ട്രെയിനുകള്‍ കാസര്‍കോട്ടേക്ക് നീട്ടുന്നത് പരിഗണനയിലാണ്. തിരുവനന്തപുരം, പാലക്കാട് ഡിവിഷനുകള്‍ക്ക് മൂന്ന് വീതം പുതിയ മെമു ട്രെയിനുകള്‍ അനുവദിക്കുന്ന കാര്യവും പരിശോധിച്ചുവരികയാണ്.
ഗുരുവായൂര്‍- തിരുനാവായ പാതയ്‌ക്ക് പണം തടസമല്ല. സംസ്ഥാനസര്‍ക്കാര്‍ ഭൂമി ഏറ്റെടുത്ത് നല്‍കിയാല്‍ മതിയെന്ന് കേന്ദ്രമന്ത്രി വ്യക്തമാക്കിയതായി കൃഷ്ണദാസ് പറഞ്ഞു. കേരളത്തില്‍ 3, 4 വരി റെയില്‍പ്പാതകള്‍ക്ക് ഡിപിആറും അലൈന്‍മെന്റും തയാറായി. നിക്ഷേപം നടത്താന്‍ റെയില്‍വേ തയാറാണെങ്കിലും സംസ്ഥാന സര്‍ക്കാരിന്റെ നിസ്സഹകരണമാണ് തടസം. 59 ലെവല്‍ക്രോസുകളില്‍ മേല്‍പ്പാലങ്ങളും അടിപ്പാതകളും നിര്‍മിക്കാനുള്ള മുഴുവന്‍ തുകയും റെയില്‍വേ വഹിക്കാമെന്ന് അറിയിച്ചിട്ടും സ്ഥലം ഏറ്റെടുത്ത് നല്‍കാനോ ഡിപിആര്‍ തയാറാക്കാനോ സംസ്ഥാനം തയാറാകുന്നില്ല. കേന്ദ്ര മന്ത്രി പലതവണ കത്തയച്ചിട്ടും ഭരണകൂടം മറുപടി പോലും നല്‍കിയിട്ടില്ല. അങ്കമാലി – എരുമേലി ശബരി പാതയുടെ കാര്യത്തിലും നിഷേധാത്മക നിലപാടാണ്. കേരളത്തിന്റെ ആവശ്യങ്ങള്‍ അടങ്ങിയ നിവേദനവും കേന്ദ്രമന്ത്രിക്ക് കൈമാറി.
