വാക്സിനെടുത്താൽ വന്ധ്യതയും ഓട്ടിസവും ഉണ്ടാകുമെന്ന തെറ്റായ പ്രചാരണം തിരിച്ചടിയാകുന്നു: സമ്പൂർണ വാക്സിനേഷൻ കൈവരിക്കാനാകാതെ കേരളം

കൊച്ചി: ആരോഗ്യരംഗത്ത് മികച്ച നേട്ടങ്ങൾ കൈവരിച്ച കേരളത്തിന് കുട്ടികളുടെ പ്രതിരോധ കുത്തിവെപ്പിൽ നൂറുശതമാനം ലക്ഷ്യം കൈവരിക്കാനാകുന്നില്ല. തെറ്റായ പ്രചാരണങ്ങളും വാക്സിനുകളെക്കുറിച്ചുള്ള അശാസ്ത്രീയ വിശ്വാസങ്ങളും കാരണം സംസ്ഥാനത്തെ പ്രതിരോധ കുത്തിവെപ്പ് നിരക്ക് 94 ശതമാനത്തിൽ തുടരുകയാണ്. ഇതോടെ അഞ്ചാംപനി, ഡിഫ്തീരിയ തുടങ്ങിയ സാംക്രമിക രോഗങ്ങളെ പൂർണമായി നിയന്ത്രിക്കുന്നതും വെല്ലുവിളിയാകുന്നു.

ആരോഗ്യവകുപ്പിന്റെ കണക്കുകൾ പ്രകാരം മലപ്പുറമാണ് പ്രതിരോധ കുത്തിവെപ്പിൽ ഏറ്റവും പിന്നിലുള്ള ജില്ല. ഇവിടെ നിരക്ക് 86 ശതമാനം മാത്രമാണ്. കോഴിക്കോട് 92 ശതമാനവും കണ്ണൂരിൽ 94 ശതമാനവുമാണ് കുത്തിവെപ്പ് നിരക്ക്.

അതേസമയം, കൊല്ലം, പത്തനംതിട്ട, ആലപ്പുഴ, കോട്ടയം ജില്ലകൾ 99 ശതമാനം നേട്ടവുമായി മുന്നിലാണ്. തിരുവനന്തപുരം, ഇടുക്കി, എറണാകുളം ജില്ലകളിൽ 98 ശതമാനവും തൃശൂരിൽ 97 ശതമാനവുമാണ് നിരക്ക്. പാലക്കാട്, വയനാട്, കാസർകോട് ജില്ലകളിൽ 96 ശതമാനം കുട്ടികൾക്ക് പ്രതിരോധ കുത്തിവെപ്പ് നൽകിയിട്ടുണ്ട്. പിന്നിലുള്ള ജില്ലകളിലും ബോധവൽക്കരണം ശക്തമാക്കി നൂറുശതമാനം ലക്ഷ്യത്തിലെത്തിക്കാമെന്ന പ്രതീക്ഷയിലാണ് ആരോഗ്യവകുപ്പ്.

പ്രതിരോധ കുത്തിവെപ്പ് ലഭിക്കാത്ത കുട്ടികളിൽ അടുത്തിടെ അഞ്ചാംപനി (മീസിൽസ്), ഡിഫ്തീരിയ തുടങ്ങിയ രോഗങ്ങൾ റിപ്പോർട്ട് ചെയ്തിരുന്നു. ഇത്തരം രോഗങ്ങൾ തടയുന്നതിനായി ആരോഗ്യവകുപ്പ് സൗജന്യമായി വാക്സിനുകൾ നൽകുന്നുണ്ട്. അഞ്ചാംപനി പ്രതിരോധിക്കാൻ എം.ആർ. വാക്സിനും ഡിഫ്തീരിയ ഉൾപ്പെടെയുള്ള രോഗങ്ങൾക്കെതിരെ പെന്റാവാലന്റ് വാക്സിനുമാണ് നൽകുന്നത്.

എന്നിട്ടും മൂന്ന് മുതൽ അഞ്ച് ശതമാനം വരെ കുട്ടികൾ വിവിധ കാരണങ്ങളാൽ പ്രതിരോധ കുത്തിവെപ്പിൽനിന്ന് വിട്ടുനിൽക്കുന്നു. പോളിയോ വാക്സിനേഷനിലും നൂറുശതമാനം നേട്ടം കൈവരിക്കാൻ സംസ്ഥാനത്തിന് ഇതുവരെ കഴിഞ്ഞിട്ടില്ല.

വാക്സിനെടുത്താൽ വന്ധ്യതയും ഓട്ടിസവും ഉണ്ടാകുമെന്ന തരത്തിലുള്ള തെറ്റായ പ്രചാരണങ്ങൾ സാമൂഹികമാധ്യമങ്ങളിലൂടെ വ്യാപിക്കുന്നതാണ് പ്രതിരോധ കുത്തിവെപ്പ് പദ്ധതിക്ക് പ്രധാന വെല്ലുവിളിയാകുന്നത്. വിദ്യാഭ്യാസമുള്ള മാതാപിതാക്കൾ പോലും ഇത്തരം അശാസ്ത്രീയ വാദങ്ങളിൽ വിശ്വസിക്കുന്ന സാഹചര്യമുണ്ടെന്ന് ആരോഗ്യരംഗത്തുള്ളവർ ചൂണ്ടിക്കാട്ടുന്നു.

കുട്ടികൾക്ക് പനി പോലുള്ള രോഗങ്ങൾ വന്ന് തനിയെ മാറുന്നതിലൂടെ സ്വാഭാവിക പ്രതിരോധശേഷി ലഭിക്കുന്നതിനാൽ വാക്സിൻ ആവശ്യമില്ലെന്ന വാദവും പ്രചരിക്കുന്നുണ്ട്. വാക്സിനിലെ ചില ഘടകങ്ങൾ മതപരമായി സ്വീകാര്യമല്ലെന്ന പ്രചാരണവും മരുന്ന് കമ്പനികളുടെ താൽപര്യങ്ങൾക്കായി കുട്ടികളെ പരീക്ഷണങ്ങൾക്ക് വിധേയരാക്കുന്നുവെന്ന ആരോപണവും ചിലരെ പ്രതിരോധ കുത്തിവെപ്പിൽനിന്ന് അകറ്റുന്നു.

തെറ്റായ വിവരങ്ങൾ തിരുത്തി വാക്സിനുകളുടെ പ്രാധാന്യത്തെക്കുറിച്ച് മാതാപിതാക്കളെ ബോധവൽക്കരിക്കുകയാണ് ഇനി നിർണായകം. ആരോഗ്യപ്രവർത്തകരുടെ ഇടപെടലും ശാസ്ത്രീയമായ വിവരങ്ങൾ ജനങ്ങളിലെത്തിക്കുന്നതും ശക്തമാക്കിയാൽ മാത്രമേ കുട്ടികളുടെ പ്രതിരോധ കുത്തിവെപ്പിൽ നൂറുശതമാനം ലക്ഷ്യം കൈവരിക്കാനാകൂ.