പാറശാല: കേരളത്തിലും തമിഴ്‌നാട്ടിലുമുള്‍പ്പെടെ വികസന വിനോദ സഞ്ചാര സാധ്യതകള്‍ തുറക്കുന്ന ദേശീയ പാത നിര്‍മ്മാണം അവസാന ഘട്ടത്തില്‍. ദേശീയപാത 47 ലെ ഗതാഗതക്കുരുക്കിന് ശാശ്വത പരിഹാരമാകുമെന്ന് കരുതുന്ന കന്യാകുമാരി മുതല്‍ മഹാരാഷ്‌ട്രയിലെ പന്‍വേല്‍ വരെയുള്ള പശ്ചിമഘട്ടത്തിനു സമാന്തരമായി കൊങ്കണ്‍ കടലോരം വഴി പോകുന്ന എന്‍എച്ച് 66 ലെ കാരോട്-കന്യാകുമാരി ബൈപാസ് നിര്‍മാണമാണ് അവസാനഘട്ടത്തിലുള്ളത്. കന്യാകുമാരി, നാഗര്‍കോവില്‍, പദ്മനാഭപുരം, വിളവങ്കോട് വഴി പാറശാല ചെങ്കവിളയില്‍ കേരളത്തില്‍ പ്രവേശിക്കുന്ന പാത പടിഞ്ഞാറന്‍ തീരത്തുകൂടി മഞ്ചേശ്വരം വഴി കര്‍ണ്ണാടകയിലേക്ക് കടക്കുന്നു.
കേരളത്തിലാണ് ദേശീയപാതയ്‌ക്ക് ഏറ്റവും ദൈര്‍ഘ്യമുള്ളത്. മംഗലാപുരം, ഉഡുപ്പി, മര്‍ഗ്ഗാവ്, സംഗമേശ്വര്‍ വഴി മുംബൈയ്‌ക്ക് അടുത്തുള്ള പന്‍വേല്‍ വരയെത്തുന്നതാണ് ദേശീയപാത അതോറിറ്റിയുടെ എന്‍എച്ച് 66 പദ്ധതി. കാരോട് മുതല്‍ കന്യാകുമാരി വരെയുള്ള നാലുവരിപ്പാത നിര്‍മ്മാണം നിലവില്‍ അവസാന ഘട്ടത്തിലാണ്. കാരോട് മുതല്‍ വില്ലുക്കുറി വരെ 27 കിലോ മീറ്ററും വില്ലുക്കുറി മുതല്‍ നാഗര്‍കോവില്‍ അപ്റ്റാ മാര്‍ക്കറ്റ് വരെ പതിനാലും, അപ്റ്റാ മാര്‍ക്കറ്റ് മുതല്‍ കാവല്‍ക്കിണര്‍ പെരുങ്കുടി വരെ പതിനാറും അപ്റ്റ മാര്‍ക്കറ്റ് മുതല്‍ കന്യാകുമാരി വരെ പന്ത്രണ്ടും കിലോ മീറ്റര്‍ ആണ് നാലുവരിപ്പാത നിര്‍മ്മാണം പൂര്‍ത്തിയാകുന്നത്. അപ്റ്റാ മാര്‍ക്കറ്റ് മുതല്‍ കാവല്‍ക്കിണര്‍ വരെയുള്ള നാലുവരിപ്പാതയുടെ നിര്‍മ്മാണം പൂര്‍ത്തിയാകുകയും വാഹനഗതാഗതം തുടങ്ങുകയും ചെയ്തു.
കാരോട് നിന്ന് കന്യാകുമാരി വരെ 54 കിലോമീറ്റര്‍ ദൂരത്താണ് നാലുവരിപ്പാതയുടെ നിര്‍മാണം 2017 ല്‍ 3000 കോടി രൂപ വകയിരുത്തിയത്. ഒരു വര്‍ഷത്തിനുശേഷം 1041 കോടി രൂപ കൂടി മുടക്കി നിര്‍മാണം വീണ്ടും ആരംഭിച്ചു. നാഗര്‍കോവിലിന് സമീപം പുത്തേരിയില്‍ അരകിലോമീറ്ററോളം ദൂരമുള്ള പാലത്തിന്റെ നിര്‍മാണവും നടന്നു വരുന്നു. കേന്ദ്ര സര്‍ക്കാരിന്റെ വിഴിഞ്ഞം തുറമുഖ പദ്ധതിയ്‌ക്കൊപ്പം കരമാര്‍ഗമുള്ള ചരക്ക് നീക്കത്തിന് പുതിയ കാരോട് കന്യാകുമാരി ബൈപാസും വികസനക്കുതിപ്പേകുകയാണ്.
വിഴിഞ്ഞത്തിലെ ചരക്കുകള്‍ കാരോട് ബൈപ്പാസിലൂടെ തമിഴ്‌നാട്ടിലെ ദേശീയ പാതയിലെത്തിച്ചാല്‍ അവിടെ നിന്ന് തമിഴ്‌നാടിന്റെ വിവിധ ഭാഗങ്ങളിലേക്കും ബംഗ്ലൂരു, ഹൈദരബാദ്, നാഗ്പൂര്‍, ഗ്വാളിയോര്‍, ദല്‍ഹി വഴി ജമ്മു കാശ്മീര്‍ വരെ നീളുന്ന ദേശീയപാത നെറ്റ് വര്‍ക്കുമായി ബന്ധിപ്പിക്കുന്ന കണ്ണിയായി കാരോട് ബൈപ്പാസ് മാറും.
നിരവധി പ്രത്യേകതകള്‍
25 വലിയ പാലങ്ങള്‍, 13 ചെറിയ പാലങ്ങള്‍, ഒരു റെയില്‍വേ മേല്‍പ്പാലം എന്നിവ പാതയിലുണ്ട്. നിര്‍മ്മാണം പൂര്‍ത്തിയാകുന്നതോടെ സംസ്ഥാന അതിര്‍ത്തിയായ ചെങ്കവിളയല്‍ നിന്നും നാഗര്‍കോവിലിലേക്ക് 30 മിനിറ്റ് കൊണ്ടും കന്യാകുമാരിയിലേക്ക് 45 മിനിറ്റ് കൊണ്ടും എത്തിച്ചേരാനാകും. കേന്ദ്ര ഉപരിതല ഗതാഗത മന്ത്രാലയത്തിന്റെ സ്വപ്‌ന പദ്ധതിയായ എന്‍എച്ച് 66 ന്റെ ഭാഗമായി തിരുവനന്തപുരം ജില്ലയില്‍ 2015 ജൂണിലായിരുന്നു കഴക്കൂട്ടം മുതല്‍ കാരോട് വരെയുള്ള ബൈപ്പാസിന്റെ നിര്‍മാണ ഉദ്ഘാടനം നടന്നത്. നാലുവരിപാതയും ഇരുവശങ്ങളിലായി സര്‍വീസ് റോഡുകളുമടക്കം 45 മീറ്റര്‍ വീതിയിലാണ് റോഡിന്റെ നിര്‍മാണം നടന്നത്.
ജന്മഭൂമി ഓണ്‍ലൈന്‍