ന്യൂയോർക്ക്: ലോകപ്രശസ്ത വിനോദസഞ്ചാര കേന്ദ്രമായ ന്യൂയോർക്കിലെ ടൈംസ് സ്ക്വയറിൽ നടന്ന കത്തിക്കുത്തിൽ ബാങ്ക് ഓഫ് അമേരിക്ക വൈസ് പ്രസിഡന്റ് എറിൻ പിയാസെന്റി (32) കൊല്ലപ്പെട്ടു. പമേല സിസ്നെറോസ് (49) എന്ന ക്വീൻസ് സ്വദേശിനിയാണ് ആക്രമണം നടത്തിയതെന്ന് ന്യൂയോർക്ക് പോലീസ് അറിയിച്ചു. രണ്ട് വലിയ കത്തികളുമായെത്തിയ ഇവർ ആദ്യം 68 വയസ്സുള്ള ഒരാളെ കുത്തിപ്പരിക്കേൽപ്പിക്കുകയും തുടർന്ന് എറിനെ ആക്രമിക്കുകയും ചെയ്തതായാണ് പോലീസ് പറയുന്നത്.
ആക്രമണങ്ങൾ യാതൊരു പ്രകോപനവുമില്ലാതെ യാദൃച്ഛികമായി നടന്നതാണെന്ന് NYPD കമ്മീഷണർ ജെസിക്ക ടിഷ് വ്യക്തമാക്കി. പരിക്കേറ്റ 68 വയസ്സുകാരൻ ആശുപത്രിയിൽ സ്ഥിരതയുള്ള നിലയിലാണ്. ഓഗസ്റ്റ് 31 തിങ്കളാഴ്ച വൈകിട്ട് ഏകദേശം 4.24-ഓടെ വെസ്റ്റ് 42-ാം സ്ട്രീറ്റ്–സെവൻത് അവന്യൂ പരിസരത്തായിരുന്നു സംഭവം. ബാങ്ക് ഓഫ് അമേരിക്കയിലെ Business Selection and Conflicts വിഭാഗത്തിൽ വൈസ് പ്രസിഡന്റായിരുന്നു എറിൻ. ആക്രമണത്തിൽ വയറിന് ഗുരുതരമായി കുത്തേറ്റ ഇവരെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ന്യൂജേഴ്സിയിലെ ചെസ്റ്റർ സ്വദേശിനിയായിരുന്നു എറിൻ.
ആക്രമണത്തിനു ശേഷം രണ്ട് കത്തികളുമായി പോലീസിന് നേരെ നീങ്ങിയ പമേലയോട് ആയുധങ്ങൾ താഴെയിടാൻ ഉദ്യോഗസ്ഥർ പലതവണ ആവശ്യപ്പെട്ടു. ടേസർ പ്രയോഗിച്ചിട്ടും ഇവരെ തടയാൻ കഴിയാതെ വന്നതോടെ രണ്ട് പോലീസ് ഉദ്യോഗസ്ഥർ വെടിയുതിർക്കുകയായിരുന്നു. ഗുരുതരമായി പരിക്കേറ്റ പമേല പിന്നീട് ആശുപത്രിയിൽ മരിച്ചു.
