തിരൂർ: കോയമ്പത്തൂർ-മംഗളൂരു ട്രെയിൻ യാത്രയ്ക്കിടെ യുവതിയെ ടോയ്ലറ്റിൽ വലിച്ചിട്ട് പീഡിപ്പിക്കാൻ ശ്രമിച്ച കേസിൽ അസം സ്വദേശി അറസ്റ്റിൽ. റോയൽ രാജു (30) ആണ് അറസ്റ്റിലായത്. ബുധനാഴ്ച ഉച്ചയ്ക്ക് ഷൊർണൂർ റെയിൽവേ സ്റ്റേഷൻ വിട്ട ശേഷമായിരുന്നു സംഭവം.
യുവതിയെ കയറിപ്പിടിച്ച പ്രതി, ടോയ്ലറ്റിലേക്ക് വലിച്ചിട്ട് പീഡിപ്പിക്കാൻ ശ്രമിക്കുകയായിരുന്നു. യുവതി കുതറിമാറി രക്ഷപ്പെടുകയും സഹയാത്രികർ ഉടൻ തന്നെ റെയിൽവേ അലർട്ടിൽ വിവരമറിയിക്കുകയുമായിരുന്നു. തുടർന്ന് തിരൂർ റെയിൽവേ സ്റ്റേഷനിൽ വച്ച് ആർ.പി.എഫ് സംഘം പ്രതിയെ പിടികൂടാൻ ശ്രമിക്കുന്നതിനിടെ ഇയാൾ എ.എസ്.ഐ ശശിയെ തലയ്ക്കടിച്ച് വീഴ്ത്തി. മറ്റു സുരക്ഷാ ഉദ്യോഗസ്ഥരൊന്നും ഡ്യൂട്ടിയിലുണ്ടായിരുന്നില്ല.
തലയ്ക്ക് ഗുരുതരമായി പരുക്കേറ്റ ശശിയെ തിരൂർ ജില്ലാ ആശുപത്രിയിൽ പ്രവേശിപ്പിച്ചു. വിവരമറിഞ്ഞ് തിരൂർ എസ്.എച്ച്.ഒ ജലീൽ കറുത്തേടത്തിന്റെ നേതൃത്വത്തിൽ എത്തിയ പോലീസ് സംഘം ഏറെ ശ്രമപ്പെട്ട് മൽപിടുത്തത്തിലൂടെയാണ് അക്രമാസക്തനായ പ്രതിയെ കീഴടക്കിയത്. ശശിക്ക് മികച്ച സേവനത്തിനുള്ള 2026-ലെ റെയിൽ സേവാ പുരസ്കാരം ലഭിച്ചിരുന്നു.
