നാഗര്കോവില് : മൂന്ന് കടലുകള് സംഗമിക്കുന്ന പുണ്യഭൂമിയായ കന്യാകുമാരിയിലെ ത്രിവേണി കടല്ക്കരയില് ഇന്നലെ വൈകുന്നേരം അസ്തമയക്കാഴ്ച ആസ്വദിക്കാന് ഇന്നലെ അനുഭവപ്പെട്ടത് വന് ജനത്തിരക്ക്.സംസ്ഥാനത്തിന്റെ വിവിധ ഭാഗങ്ങളില് നിന്നെത്തിയ വിനോദസഞ്ചാരികള്ക്കൊപ്പം വിവിധ സംസ്ഥാനങ്ങളില് നിന്നുള്ള സഞ്ചാരികളും കടല്ത്തീരത്തെ പടിക്കെട്ടുകളില് നിറഞ്ഞു.
സൂര്യന് അറബിക്കടലിന്റെ ചക്രവാളത്തിലേക്ക് മറഞ്ഞിറങ്ങുന്ന കാഴ്ച കാണാന് നൂറുകണക്കിന് ആളുകള് മണിക്കൂറുകള്ക്ക് മുന്പേ തന്നെ ത്രിവേണി സംഗമസ്ഥാനത്ത് എത്തിയിരുന്നു. കുടുംബങ്ങളായും സുഹൃദ് സംഘങ്ങളായും എത്തിയവര് മൊബൈല് ഫോണുകളിലും ക്യാമറകളിലും അസ്തമന ദൃശ്യങ്ങള് പകര്ത്തുന്നതും പതിവ് കാഴ്ചയായി.
കന്യാകുമാരിയുടെ ഏറ്റവും വലിയ ടൂറിസം ആകര്ഷണങ്ങളിലൊന്നാണ് ദിവസേന ആയിരങ്ങളെ ആകര്ഷിക്കുന്ന സൂര്യാസ്തമയം. ഒരേ സ്ഥലത്ത് സൂര്യോദയവും സൂര്യാസ്തമനവും ആസ്വദിക്കാനാകുന്ന അപൂര്വ സവിശേഷതയാണ് ഈ തീരദേശ നഗരത്തെ രാജ്യാന്തര വിനോദസഞ്ചാര ഭൂപടത്തില് വേറിട്ടതാക്കുന്നത്.
കൂടാതെ വിവേകാനന്ദപ്പാറ, തിരുവള്ളുവര് പ്രതിമ, ഭഗവതി അമ്മന് ക്ഷേത്രം, ഗാന്ധി മണ്ഡപം, എന്നിവയും കന്യാകുമാരിയുടെ ടൂറിസം പ്രാധാന്യം വര്ധിപ്പിക്കുന്ന പ്രധാന ആകര്ഷണങ്ങളാണ്.
വാരാന്ത്യമായതിനാല് സാധാരണ ദിവസങ്ങളേക്കാള് കൂടുതല് തിരക്കാണ് കടല്ത്തീരത്ത് അനുഭവപ്പെട്ടത്. വിനോദസഞ്ചാരികളുടെ സുരക്ഷയും ഗതാഗത നിയന്ത്രണവും ഉറപ്പാക്കാന് പോലീസ് ഇന്നലെ ആവശ്യമായ ക്രമീകരണങ്ങള് ഒരുക്കിയിരുന്നു.സായാഹ്നത്തിന്റെ മങ്ങലേറിയ ആകാശവും കടല്തിരമാലകളുടെ സംഗീതവും സന്ദര്ശകര്ക്ക് മറക്കാനാകാത്ത അനുഭവമാണ് സമ്മാനിച്ചത്.
ജന്മഭൂമി ഓണ്ലൈന്