ചെന്നൈ: കേന്ദ്രത്തിന്റെ അനുമതിയില്ലാതെ ഏഴ് ഐഎഎസ് ഉദ്യോഗസ്ഥരെ തമിഴ്നാട് സര്ക്കാര് ചീഫ് സെക്രട്ടറി പദവിയിലേക്ക് സ്ഥാനക്കയറ്റം നല്കിയതായി കേന്ദ്ര പേഴ്സണല് മന്ത്രാലയം മദ്രാസ് ഹൈക്കോടതിയെ അറിയിച്ചു. ഈ സ്ഥാനക്കയറ്റങ്ങളില് ആവശ്യമായ നടപടി സ്വീകരിക്കുമെന്നും മന്ത്രാലയത്തിന്റെ അഭിഭാഷകന് വ്യക്തമാക്കി.
മുന് ധനകാര്യ സെക്രട്ടറി ടി. ഉദയചന്ദ്രന് ഉള്പ്പെടെയുള്ള ഏഴ് ഉദ്യോഗസ്ഥരെ ചീഫ് സെക്രട്ടറി ഗ്രേഡിലേക്ക് സ്ഥാനക്കയറ്റം നല്കിക്കൊണ്ടുള്ള പൊതുതാല്പ്പര്യ ഹര്ജിയിലാണ് മന്ത്രാലയം ഇക്കാര്യം അറിയിച്ചത്.
ചെന്നൈയിലെ അഭിഭാഷകനായ എം. ബാലകൃഷ്ണനാണ് പൊതുതാല്പര്യ ഹര്ജി സമര്പ്പിച്ചത്. എന്നാല് സര്ക്കാര് സര്വീസുമായി ബന്ധപ്പെട്ട ഒരു വിഷയത്തില് പൊതുതാല്പര്യ ഹര്ജി നിലനില്ക്കില്ലെന്ന് ചൂണ്ടിക്കാട്ടി ഹര്ജി ഹൈക്കോടതി തള്ളി. ബന്ധപ്പെട്ട ഉദ്യോഗസ്ഥര്ക്ക് ഹര്ജി നല്കാമെന്ന് കോടതി വ്യക്തമാക്കി.
















