മുംബൈ: ബോളിവുഡ് നടൻ ടൈഗർ ഷ്റോഫിനെ ലക്ഷ്യമിട്ടുള്ള വെടിവയ്പ്പ് കേസിൽ കൂടുതൽ വിവരങ്ങൾ പുറത്ത്. നടനെ ആക്രമിക്കാൻ 34,000 രൂപയുടെ കരാർ ഉറപ്പിച്ചിരുന്നുവെന്നാണ് അന്വേഷണവുമായി ബന്ധപ്പെട്ട റിപ്പോർട്ടുകൾ. കാലിഫോർണിയയിലിരുന്ന് സംഘത്തെ നിയന്ത്രിച്ചിരുന്നതായി സംശയിക്കുന്ന അനിൽ പണ്ഡിറ്റ് എന്നയാൾ പ്രതികൾക്ക് പണവും വിദേശത്ത് ജോലിയും വാഗ്ദാനം ചെയ്തതായും അറസ്റ്റിലായവർ മൊഴി നൽകി.
മുംബൈ പോലീസിന്റെ കസ്റ്റഡിയിലുള്ള മൂന്ന് പ്രതികളെ രാജസ്ഥാനിലെ കോട്ടയിലെ റെയിൽവേ കോളനി പോലീസ് സ്റ്റേഷനിൽ ചോദ്യം ചെയ്തുവരികയാണ്. രാത്രിയിൽ പല ഘട്ടങ്ങളിലായി നടത്തിയ ചോദ്യം ചെയ്യലിൽ നിർണായക വിവരങ്ങൾ ലഭിച്ചതായാണ് സൂചന. ഒക്ടോബർ 20ന് രാവിലെ എട്ടുമണിയോടെ പ്രതികളെ റോഡ് മാർഗം മുംബൈയിലേക്ക് കൊണ്ടുപോകുമെന്നാണ് പ്രതീക്ഷിക്കുന്നത്.
അനിൽ പണ്ഡിറ്റ് വിദേശത്തുനിന്ന് നിർദേശങ്ങൾ നൽകിയെന്നും പണവും ആയുധങ്ങളും എത്തിച്ചുനൽകിയെന്നും അന്വേഷണസംഘം സംശയിക്കുന്നു. ‘ജാംഗി’ (Jangi) എന്ന ആപ്പ് വഴിയാണ് പ്രതികൾ ഇയാളുമായി ആശയവിനിമയം നടത്തിയിരുന്നതെന്നാണ് വിവരം. ഇയാളെ നേരിട്ട് കണ്ടിട്ടില്ലെന്നും പ്രതികൾ മൊഴി നൽകി. മുംബൈയിൽ കഴിയുന്നതിനിടെ പ്രതികൾക്ക് ദിവസവും 5,000 മുതൽ 10,000 രൂപ വരെ ഓൺലൈനായി ലഭിച്ചിരുന്നു. നേരിട്ടുള്ള സാമ്പത്തിക ഇടപാടുകൾ ഒഴിവാക്കാൻ പ്രാദേശിക കടയുടമകളുടെയോ മറ്റുള്ളവരുടെയോ ക്യുആർ കോഡുകൾ ഉപയോഗിച്ചാണ് പണം കൈപ്പറ്റിയതെന്നാണ് അന്വേഷണത്തിലെ കണ്ടെത്തൽ.
വെടിവയ്‌പ്പിനുശേഷം പ്രതികൾ അന്ധേരി റെയിൽവേ സ്റ്റേഷനിലെത്തി ലോക്കൽ ട്രെയിനിലാണ് യാത്ര ചെയ്തത്. രണ്ടോ മൂന്നോ സ്റ്റേഷനുകൾക്കുശേഷം ഇറങ്ങിയ ഇവർ, ഓൺലൈൻ ടാക്സിയിൽ സൂറത്തിലേക്ക് പോയെന്നും അവിടെനിന്ന് പൂനെ–ജയ്‌പൂർ ട്രെയിനിൽ കയറിയെന്നും അന്വേഷണ സംഘം കണ്ടെത്തി. തിരിച്ചറിയാതിരിക്കാനായി പ്രതികൾ യാത്രയ്‌ക്കിടെ മുടി മുറിക്കുകയും വസ്ത്രം മാറുകയും ചെയ്തിരുന്നു. കോട്ടയിൽനിന്ന് പിടികൂടുമ്പോൾ ഇവരുടെ രൂപഭാവങ്ങളിൽ മാറ്റമുണ്ടായിരുന്നു. ബാഗിൽ വസ്ത്രങ്ങൾ മാത്രമാണ് ഉണ്ടായിരുന്നതെന്നും ആയുധങ്ങളൊന്നും കണ്ടെത്തിയില്ലെന്നും അന്വേഷണ ഉദ്യോഗസ്ഥർ അറിയിച്ചു. ആയുധങ്ങൾ എവിടെയെങ്കിലും ഉപേക്ഷിച്ചിട്ടുണ്ടോയെന്നും പരിശോധിക്കുന്നുണ്ട്.
മോഷ്ടിക്കപ്പെട്ട ഒരു മോട്ടോർ സൈക്കിൾ പ്രതികൾക്ക് ലഭ്യമാക്കിയത് ഋതിക് എന്നയാളാണെന്നും അന്വേഷണത്തിൽ വ്യക്തമായതായി റിപ്പോർട്ടിൽ പറയുന്നു. ഇൻഡോറിലെയും മുംബൈയിലെയും ബന്ധങ്ങൾ വഴിയാണ് പ്രതികൾക്ക് ആയുധങ്ങൾ ലഭിച്ചത്. ആയുധങ്ങൾ കൈമാറാൻ ആരും നേരിട്ട് എത്തിയിരുന്നില്ലെന്നും പകരം, മാലിന്യക്കൂമ്പാരത്തിന് സമീപം പെട്ടിയിൽ ഒളിപ്പിച്ചുവെച്ച ആയുധങ്ങൾ എവിടെനിന്ന് എടുക്കണമെന്നറിയിക്കുന്ന വീഡിയോകളും സ്ഥലവിവരങ്ങളും അയച്ചുകൊടുക്കുകയായിരുന്നുവെന്നും റിപ്പോർട്ടുകൾ പറയുന്നു.
ആശയവിനിമയത്തിന് ഉപയോഗിച്ച ‘ജാംഗി’ ആപ്പിൽ അക്കൗണ്ട് തുടങ്ങാൻ ഫോൺ നമ്പറോ വ്യക്തിഗത വിവരങ്ങളോ ആവശ്യമില്ലെന്നാണ് പറയപ്പെടുന്നത്. പിടിക്കപ്പെടാതിരിക്കാനായി സംഭാഷണങ്ങൾക്കുശേഷം സിം കാർഡുകൾ നശിപ്പിച്ചുകളഞ്ഞതായും അന്വേഷണസംഘം സംശയിക്കുന്നു. പ്രതികളായ റെഹാനും ഫൂൽ സിംഗും നേരത്തേ അമൃത്സറിൽ ഒരു വ്യവസായിക്കെതിരെ ആക്രമണം നടത്തിയിരുന്നതായും കണ്ടെത്തിയിട്ടുണ്ട്. ഈ സംഭവത്തിൽ അവരുടെ പങ്ക്, ആയുധങ്ങളുടെ ഉറവിടം, വിദേശത്തുനിന്ന് നിർദേശങ്ങൾ നൽകിയതായി സംശയിക്കുന്ന വ്യക്തിയുടെ പങ്കാളിത്തം എന്നിവ ഉൾപ്പെടെയുള്ള കാര്യങ്ങളിൽ അന്വേഷണം തുടരുകയാണ്.
