ചെന്നൈ: കരൂരില് ടിവികെ റാലിയില് തിക്കിലും തിരക്കിലുംപെട്ട് മരിച്ചവരുടെ ആശ്രിതര്ക്ക് തുടര് ഉത്തരവുകള്ക്ക് വിധേയമായി ജോലി നല്കാന് മദ്രാസ് ഹൈക്കോടതി തമിഴ്നാട് സര്ക്കാരിന് അനുമതി നല്കി. കേസ് വീണ്ടും പരിഗണിക്കുന്നതുവരെ ജോലി നേടുന്നവര്ക്ക് ആദ്യ ശമ്പളം നല്കരുതെന്ന് കോടതി നിര്ദേശിച്ചു.
ഏകീകൃത സര്ക്കാര് നയമില്ലാതെ ഇത്തരം നിയമനങ്ങള് നടത്താന് കഴിയുമോ എന്ന് പരിശോധിക്കുമെന്ന് ജസ്റ്റിസുമാരായ സി വി കാര്ത്തികേയനും ആര് ശക്തിവേലും അടങ്ങുന്ന ബെഞ്ച് വ്യക്തമാക്കി. നിയമനങ്ങളുമായി ബന്ധപ്പെട്ട മാര്ഗ്ഗനിര്ദ്ദേശങ്ങള് വിശദീകരിക്കുന്ന റിപ്പോര്ട്ട് സമര്പ്പിക്കാനും, ഈ കേസില് ആ വ്യവസ്ഥകള് പാലിച്ചിട്ടുണ്ടോ എന്ന് അറിയിക്കാനും കോടതി സര്ക്കാരിനോട് നിര്ദ്ദേശിച്ചു. കേസില് 21 ന് അടുത്ത വാദം കേള്ക്കും.
2025 സെപ്റ്റംബറില് കരൂരില് നടന്ന ടിവികെ റാലിയില് തിക്കിലും തിരക്കിലും മരിച്ച 41 പേരുടെ ആശ്രിതര്ക്ക് കാരുണ്യത്തിന്റെ അടിസ്ഥാനത്തില് തൊഴില് നല്കാനുള്ള സര്ക്കാര് തീരുമാനത്തെ ചോദ്യം ചെയ്തുള്ള ഹര്ജികളിലാണ് ഈ നിര്ദേശങ്ങള് പുറപ്പെടുവിച്ചത്.
