ന്യൂഡൽഹി: ജുമാ മസ്ജിദ് മെട്രോ സ്റ്റേഷനിൽ സുരക്ഷാ പരിശോധനയ്ക്കിടെ സംശയാസ്പദമായി കണ്ടെത്തിയയാളെ സാഹസികമായി പിടികൂടി സിഐഎസ്എഫ് ജവാൻ. മെറ്റൽ ഡിറ്റക്ടർ ഫ്രെയിം കടന്ന് എസ്കലേറ്ററിലേക്ക് ഓടിയ യാത്രക്കാരനെ പടിക്കെട്ടിലൂടെ ഓടിച്ചാണ് പിടികൂടിയത്. ഉത്തർപ്രദേശിലെ മുസഫർനഗർ സ്വദേശിയായ മുഹമ്മദ് ഷുഐബാണ് പിടിയിലായത്. യാത്രക്കാരന്റെ ബാഗ് പരിശോധിച്ചപ്പോൾ അടിവസ്ത്രത്തിനുള്ളിൽ ഒളിപ്പിച്ച നിലയിൽ 155 ഗ്രാം തൂക്കമുള്ള സ്വർണപ്പൊടിക്ക് സമാനമായ വസ്തു കണ്ടെത്തി.
അടിവസ്ത്രത്തിനുള്ളിൽ തുന്നിച്ചേർത്ത നിലയിലായിരുന്നു വസ്തു കണ്ടെടുത്തത്. മലേഷ്യയിൽ താമസിക്കുന്ന താൻ ടെക്സ്റ്റൈൽ മേഖലയിലാണ് ജോലി ചെയ്യുന്നതെന്ന് ചോദ്യം ചെയ്യലിൽ ഷുഐബ് പറഞ്ഞു. മലേഷ്യയിലെ ക്വാലാലംപൂരിലാണ് ഇയാൾ താമസിക്കുന്നത്.യാത്രക്കാരന്റെ ബാഗേജ് എക്സ്-റേ പരിശോധനാ സംവിധാനത്തിലൂടെ പരിശോധിക്കുന്നതിനിടെ സംശയകരമായ വസ്തു ശ്രദ്ധയിൽപ്പെട്ടതോടെയാണ് സിഐഎസ്എഫ് ഉദ്യോഗസ്ഥർ പരിശോധന ശക്തമാക്കിയത്. തുടർന്ന് രക്ഷപ്പെടാൻ ശ്രമിച്ചയാളെ പിന്തുടർന്ന് പിടികൂടുകയായിരുന്നു.
ഓടിരക്ഷപ്പെടാൻ ശ്രമിക്കുന്ന യുവാവിനെ പടിക്കെട്ട് ഓടിക്കയറി ഉദ്യോഗസ്ഥൻ സാഹസികമായി പിടികൂടുന്ന സിസിടിവി ദൃശ്യങ്ങൾ സിഐഎസ്എഫിന്റെ ഔദ്യോഗിക എക്സ് പോസ്റ്റിലൂടെ പങ്കുവച്ചിട്ടുണ്ട്.ഒക്ടോബർ 16-ന് ഈ വസ്തുവുമായി ഡൽഹിയിലെത്തിയതായും ജുമാ മസ്ജിദ് പ്രദേശത്തെ ‘വാസിർ’ എന്ന ഹോട്ടലിൽ താമസിച്ചതായും ഇയാൾ പൊലീസിനോട് പറഞ്ഞു. സംഭവദിവസം ലജ്പത് നഗറിലേക്ക് പോകാനായി ജുമാ മസ്ജിദ് മെട്രോ സ്റ്റേഷനിലെത്തിയപ്പോഴാണ് സുരക്ഷാ പരിശോധനയ്ക്കിടെ പിടിയിലായത്.
