തിരുവനന്തപുരം: സംസ്ഥാനത്തിന്റെ രാഷ്ട്രീയ ഭാവി അറിയാന് ഒരുദിവസം മാത്രം. നിയമസഭാ തെരഞ്ഞെടുപ്പിന്റെ വോട്ടെണ്ണല് തിങ്കളാഴ്ച. നാളെ രാവിലെ 8 മുതല് വോട്ടെണ്ണല് തുടങ്ങും. സംസ്ഥാനത്തെ 140 മണ്ഡലങ്ങളിലായി 43 വോട്ടെണ്ണല് കേന്ദ്രങ്ങളില് രാവിലെ 8 മണി മുതല് ഫലം അറിഞ്ഞുതുടങ്ങും.
രാവിലെ 6ന് കൗണ്ടിങ് ഉേദ്യാഗസ്ഥരെത്തും. 7ന് ലോഗ് ബുക്കില് വിവരങ്ങള് രേഖപ്പെടുത്തുന്നതോടെ വോട്ടെണ്ണല് നടപടികള് ആരംഭിക്കും. പൂട്ടിന്റെ സീല് പരിശോധിച്ച് ബോധ്യപ്പെടുത്തിയ ശേഷം പൊട്ടിച്ച്, പൂട്ട് തുറക്കും. ഇതുള്പ്പെടെ കൗണ്ടിങ് ഹാളില് വോട്ടിങ് യന്ത്രം എത്തിക്കുന്നതുവരെയുള്ള എല്ലാ നടപടിയും വീഡിയോയില് റിക്കാര്ഡ് ചെയ്യും. 8 മണിക്ക് തപാല് വോട്ട് എണ്ണിത്തുടങ്ങും. അതിനുശേഷമാകും ഇവിഎമ്മിലെ വോട്ടെണ്ണല് തുടങ്ങുക. തപാല് വോട്ടുകള് ഇല്ലാത്ത മണ്ഡലങ്ങളില് എട്ടിനുതന്നെ ഇവിഎം വോട്ടെണ്ണല് ആരംഭിക്കും.
ഫലപ്രഖ്യാപനത്തോടനുബന്ധിച്ച് സംസ്ഥാനത്ത് കനത്ത സുരക്ഷാ ക്രമീകരണങ്ങളാണ് ഡിജിപിയുടെ നേതൃത്വത്തില് ഒരുക്കിയിരിക്കുന്നത്. മലപ്പുറത്തും കോഴിക്കോടും സംഘര്ഷ സാധ്യതയുള്ള പ്രദേശങ്ങളില് പ്രത്യേക ജാഗ്രതാ നിര്ദേശം നല്കിയിട്ടുണ്ട്. പടക്കം വില്പനക്കും കര്ശന നിരോധനം ഏര്പ്പെടുത്തി. വോട്ടെണ്ണല് കേന്ദ്രങ്ങളില് സുരക്ഷ ശക്തമാക്കാന് ക്യുആര് കോഡ് അധിഷ്ഠിത തിരിച്ചറിയല് സംവിധാനം ഏര്പ്പെടുത്തിയിട്ടുണ്ട്.
