തിരുവനന്തപുരം: കോണ്ഗ്രസിലെ മുഖ്യമന്ത്രി പോരിനിടെ ഷാഫി പറമ്പിൽ എംപിക്ക് നേരെ രൂക്ഷ വിമർശനവുമായി കോണ്ഗ്രസ് സൈബർ അണികൾ. ‘യൂ ടൂ ബ്രൂട്ടസ്’ …എന്നാണ് കോണ്ഗ്രസ് നേതാവ് ഷാഫി പറമ്പിലിനെ വി.ഡി. സതീശന്റെ അനുയായികള് വിശേഷിപ്പിച്ചത്.
ബ്രൂട്ടസ് എന്നത് ഷേക്സ്പിയറിന്റെ വിഖ്യാത നാടകമായ ജൂലിയസ് സീസറിലെ ചതിയനായ കഥാപാത്രമാണ്. രാജാവായ ജൂലിയസ് സീസറിന്റെ അടുത്ത അനുയായി ആണെങ്കിലും സീസറിന്റെ കൊലപാതകത്തില് ബ്രൂട്ടസും പങ്കാളിയായത് അറിഞ്ഞ് മരിയ്ക്കുമ്പോള് ജൂലിയസ് സീസര് പറയുന്ന വാചകമാണ്…”ബ്രൂട്ടസേ, നീയും” (യൂ ടൂ ബ്രൂട്ടസ്) എന്നത്. മുഖ്യമന്ത്രി സ്ഥാനത്തേക്ക് വി ഡി സതീശനെ പിന്തുണക്കാതെ കെ സി വേണുഗോപാലിനെ പിന്തുണച്ചു എന്ന് ആരോപിച്ചാണ് സതീശന് വിഭാഗം ഷാഫി പറമ്പിനെതിരെ തിരിഞ്ഞിരിക്കുന്നത്. നേരത്തെ സതീശന്റെ അടുത്തയാളായി നിന്ന നേതാവായിരുന്നു ഷാഫി പറമ്പില്. പക്ഷെ മുഖ്യമന്ത്രിക്കസേരയുടെ പ്രശ്നം വന്നപ്പോള് സതീശനെ ചതിച്ചു എന്ന വികാരമാണ് സതീശന് അണികള്ക്കുള്ളത്.
“കുത്താൻ ശ്രമിച്ചാൽ വരുംകാലങ്ങളിൽ നിയമസഭ കാണാൻ ഷാഫിക്ക് കഴിയില്ല.കഴിഞ്ഞ അഞ്ച് വർഷത്തെ വിഡി സതീശന്റെ കഠിനാധ്വാനമാണ് യുഡിഎഫിന് കരുത്ത് നൽകിയത്, അദ്ദേഹത്തെ പിന്നിൽ നിന്ന് കുത്താൻ ശ്രമിച്ചാൽ വരുംകാലങ്ങളിൽ നിയമസഭ കാണാൻ ഷാഫിക്ക് കഴിയില്ലെന്നും വിമർശനം ഉയരുന്നു
“:-എന്ന രീതിയിലാണ് സതീശന് അണികളുടെ ഷാഫി പറമ്പിലിന് എതിരായ ഭീഷണി. ‘നമ്മള് ജയിച്ചു സാർ, അങ്ങയെ ക്രൂശിച്ചവരെ ജനം ശിക്ഷിച്ചു’ എന്ന് ഉമ്മൻചാണ്ടിയുടെ ഫോട്ടോ ഉൾപ്പെടുത്തി ഷാഫിയിട്ട പോസ്റ്റിന് താഴെയാണ് കോൺഗ്രസ് അണികൾ രൂക്ഷ വിമർശനം ഉന്നയിക്കുന്നത്.
‘വർത്തമാന കേരളത്തിലെ ഏറ്റവും വെറുക്കപ്പെട്ട രാഷ്ട്രീയക്കാരനാണ് കെസി, ജനങ്ങളെ വിഡ്ഢികളാക്കരുത്, വിഡിയാണ് ഗെയിം ചെയ്ഞ്ചർ, ഇപ്പോൾ വിഡി യെ ക്രൂശിക്കാൻ ഇറങ്ങുന്ന താങ്കളെയും ജനം ശിക്ഷിക്കും, യൂ ടൂ ബ്രൂട്ടസ്’ എന്നെല്ലാമാണ് കമന്റുകൾ.
