തിരുവനന്തപുരം: അയ്യപ്പ സംഗമത്തില് പങ്കെടുക്കാനെത്തിയ എസ് എന് ഡി പി യോഗം ജനറല് സെക്രട്ടറി വെള്ളാപ്പളളി നടേശനെ കാറില് കയറ്റിയതിനെ മാധ്യമങ്ങള് വിമര്ശിക്കെ, അതിനെ ന്യായീകരിച്ച് മുഖ്യമന്ത്രി പിണറായി വിജയന്.വെളളാപ്പളളിയെ താന് കാറില് കയറ്റില്ലെന്ന ബിനോയ് വിശ്വത്തിന്റെ പരാമര്ശത്തിന് മറുപടി നല്കുകയായിരുന്നു മുഖ്യമന്ത്രി.
ബിനോയ് വിശ്വമല്ല താന്. താന് പിണറായി വിജയനാണ്. കാറില് കയറ്റിയത് ശരി തന്നെ. അതില് മാറ്റമില്ല.സിപിഐയുമായി ഉള്ളത് ഊഷ്മളബന്ധമാണ്. മുന്നണിയിലെ പ്രധാന ഘടകകക്ഷിയാണ്. സി പി ഐ ചതിയും വഞ്ചനയും കാണിക്കുമെന്ന് തങ്ങള്ക്ക് അഭിപ്രായമില്ലെന്നും മുഖ്യമന്ത്രി പറഞ്ഞു.
9 വര്ഷം ഭരണത്തിന്റെ പങ്ക് പറ്റിയിട്ട് ഇപ്പോള് വിമര്ശിക്കുന്ന സി പി ഐചതിയന് ചന്തുവാണെന്ന് വെളളാപ്പളളി പറഞ്ഞിരുന്നു.എന്നാല് ചതിയന് ചന്തുവെന്ന പേര് ആയിരം തവണ ചേരുന്നത് വെള്ളാപ്പള്ളി നടേശന് തന്നെയാണെന്നായിരുന്നു ബിനോയ് വിശ്വത്തിന്റെ പ്രതികരണം. വെള്ളാപ്പള്ളിയെ താന് കാറില് കയറ്റില്ല, കണ്ടാല് ചിരിക്കും, കൈകൊടുക്കും. അത്രമാത്രമായിരിക്കും ഇടപെടലെന്ന് ബിനോയ് വിശ്വം പറഞ്ഞു. എല്ഡിഎഫ് സര്ക്കാരിന് മാര്ക്കിടാന് ആരും അദ്ദേഹത്തെ ചുമതലപെടുത്തിയിട്ടില്ലെന്നും സിപിഐ സംസ്ഥാന സെക്രട്ടറി വാര്ത്താസമ്മേളനത്തില് വ്യക്തമാക്കി.
അടുത്ത തിരഞ്ഞെടുപ്പില് ആര് നയിക്കുമെന്ന് ഇതുവരെ ആലോചിച്ചിട്ടില്ലെന്ന് മുഖ്യമന്ത്രി പിണറായി വിജയന് പറഞ്ഞു.അത് വ്യക്തിപരമായി തീരുമാനിക്കുന്നതല്ല. താന് മത്സരിക്കുന്ന കാര്യം ഇതുവരെ ആലോചിച്ചിട്ടില്ല. വ്യക്തിപരമായി താന് ആലോചിക്കേണ്ട കാര്യമല്ല. പൊതുവേ പാര്ട്ടി തീരുമാനിക്കുകയാണ് പതിവ്. താനാണോ നയിക്കേണ്ടത് എന്നത് താന് പറയേണ്ട കാര്യമല്ല. അതില് പാര്ട്ടി വ്യക്തത വരുത്തും.
തിരുവനന്തപുരം കോര്പ്പറേഷനിലെ ചില ഡിവിഷനില് യുഡിഎഫ് വോട്ട് വല്ലാതെ കുറഞ്ഞു. അത് ബിജെപിക്ക് പോയിട്ടുണ്ട്. ഇടതു മുന്നണി ജയിച്ചു വരാന് ഇടയുള്ള സ്ഥലത്ത് പരസ്പരം നീക്കുപോക്കുണ്ട്. നമ്മുടെ സമൂഹത്തിന്റെ ജാഗ്രതയില് കുറവ് വരുന്നുണ്ടോ എന്ന് പരിശോധിക്കണം.
കോണ്ഗ്രസ് നാലു വോട്ടിനുവേണ്ടി ഏത് വര്ഗീയതയുമായും കൂടിച്ചേരുന്നതിന് മടി കാണിച്ചിട്ടില്ല. നേമത്ത് ബിജെപി ജയിച്ചത് കോണ്ഗ്രസ് വോട്ട് കൊണ്ടാണെന്ന് മുഖ്യമന്ത്രി ആരോപിച്ചു. തൃശൂരിലും അതു തന്നെ സംഭവിച്ചെന്നും അഭിപ്രായപ്പെട്ടു.
കുറച്ചു വോട്ടിനും നാല് സീറ്റിനും വേണ്ടി വര്ഗീയശക്തികളുമായി കൂട്ടുചേരുക എന്ന രാഷ്ട്രീയ ചെറ്റത്തരം തങ്ങള് കാട്ടില്ലെന്നുമാണ് മുഖ്യമന്ത്രിയുടെ അവകാശവാദം. വര്ഗീയശക്തികളെ അകറ്റി നിര്ത്തുമെന്നും പറഞ്ഞു.
