തിരുവനന്തപുരം: നാല്പത്തഞ്ച് വര്‍ഷത്തെ ഭരണം കൊണ്ട്
സിപി എം തിരുവനന്തപുരം നഗരത്തെ നശിപ്പിച്ചെന്നും നഗരം വീണ്ടെടുക്കാന്‍ അധികാരം ലഭിച്ചാല്‍ നാല്പത്തഞ്ച് ദിവസത്തിനകം വികസന രേഖ അവതരിപ്പിക്കുമെന്നും വികസിത തിരുവനന്തപുരവും, അഴിമതി രഹിത ഭരണവുമാണ് ബിജെപി വാഗ്ദാനം ചെയ്യുന്നതെന്നും ബിജെപി സംസ്ഥാന അദ്ധ്യക്ഷന്‍ രാജീവ് ചന്ദ്രശേഖര്‍ പറഞ്ഞു.
ജനാധിപത്യ സംവിധാനത്തില്‍ സാധാരാണ പൗരന്റെ വീടിന് ചുറ്റുമുള്ള പ്രശ്‌നങ്ങള്‍ക്ക് പരിഹാരം കാണേണ്ടത് തദ്ദേശീയ സ്വയംഭരണ സ്ഥാപനങ്ങളാണെന്നും അവയിലേയ്‌ക്കുള്ള തിരഞ്ഞടുപ്പ് വളരെ പ്രാധാന്യത്തോടെ കാണണമെന്നും രാജീവ് ചന്ദ്രശേഖര്‍ പറഞ്ഞു.
45 വര്‍ഷം തുടര്‍ച്ചയായി നഗരസഭ ഭരിച്ച സി പി എം നഗരത്തിന് ഒന്നും നല്‍കിയിട്ടില്ലെന്നും, എന്നാല്‍ നഗരം ഭരിയ്‌ക്കാന്‍ ഒമ്പത് പ്രാവശ്യം നഗരവാസികള്‍ അവസരം നല്‍കിയ സി പി എം അത് അഴിമതി നടത്തി കൊള്ളയടിക്കാനുള്ള അവസരമാക്കി മാറ്റിയെന്നും രാജീവ് ചന്ദ്രശേഖര്‍ ആരോപിച്ചു.
ബിജെപി തിരുവനന്തപുരം നഗരസഭ തെരഞ്ഞെടുപ്പിലെ പ്രകടനപത്രികയും വികസന രേഖയും പ്രകാശനം ചെയ്തു സംസാരിക്കുകയായിരുന്നു രാജീവ് ചന്ദ്രശേഖര്‍.
