ന്യൂദല്ഹി: കോരാപുട്ട് എന്നത് ഒഡിഷയിലെ ഗോത്രസമുദായത്തിന്റെ ജില്ലയാണ്. ഇന്ദിരാഗാന്ധിയുടെ ഭരണകാലത്തും മറ്റും കോരാപുട്ടിലെ ദാരിദ്ര്യം ഉയര്ത്തിക്കാട്ടി ഗരീബി ഹഠാവോ (ദാരിദ്ര്യ നിര്മ്മാര്ജ്ജനം) എന്ന മുദ്രാവാക്യം ഉയര്ത്തിയെങ്കിലും ദാരിദ്ര്യം കുറഞ്ഞില്ല.
ഇപ്പോഴിതാ ഏറ്റവും പുതിയ മന്കീബാത്തില് ഞായറാഴ്ച മോദി കോരാപുട്ടിനെക്കുറിച്ച് പറഞ്ഞു. കോരാപുട്ട് എന്ന ഗോത്രവര്ഗ്ഗ മേഖലയിലെ ദാരിദ്ര്യത്തെക്കുറിച്ചല്ല, അവിടുത്തെ രുചിരമായ കോഫിയെക്കുറിച്ചാണ് മോദി വിവരിച്ചത്. അധികം ആര്ക്കും അറിയാത്ത കോരാപുട്ടിന്റെ നല്ലൊരു മുഖമാണ് മോദി ഉയര്ത്തിക്കാട്ടാന് ശ്രമിച്ചത്.
ഇന്ദിരാഗാന്ധിയുടെ കാലത്തേത് പോലെ ഒഡിഷയുടെ അപമാനല്ല, അഭിമാനമായ കോരാപുട്ടിനെക്കുറിച്ചാണ് മോദി പറഞ്ഞത്. അവിടെ വിളയുന്ന രുചിയൂറും കോഫിയാണ് കോരാപുട്ടിനെ ഒഡിഷയുടെ അഭിമാനമാക്കി മാറ്റുന്നതെന്ന് മോദി പറഞ്ഞു.
“കോരാപുട്ടിലെ കോഫിയുടെ ഗന്ധം അസാധാരണമാണ്. എന്നാല് ഈ രുചിയ്ക്കപ്പുറം ഇവിടുത്തെ കാപ്പികൃഷി ഈ പ്രദേശത്തെ മുഴുവന് പേര്ക്കും ആദായം നല്കുന്ന ഏര്പ്പാടായി മാറിയിരിക്കുന്നു. ചിലര് കാപ്പിയോടുള്ള അഭിനിവേശം മൂലം കാപ്പിക്കൃഷിയില് ഏര്പ്പെടുന്നവരാണ്. മികച്ച ശമ്പളമുളള കോര്പറേറ്റ് ജോലി ഉപേക്ഷിച്ച് കാപ്പികൃഷിയിലേക്ക് തിരിഞ്ഞ പലരും ഈ കൃഷിയില് വിജയിച്ചിരിക്കുന്നു. “- മോദി മന്കീ ബാത്തില് പറഞ്ഞു.
“ഇവിടുത്തെ പല സ്ത്രീകളുടെയും ജീവിതം ഈ കാപ്പികൃഷികൊണ്ട് മെച്ചപ്പെട്ട മാറ്റങ്ങള് ഉണ്ടായി.കോഫി അവരുടെ ജീവിതത്തില് അഭിവൃദ്ധിയും അഭിമാനവും കൊണ്ടുവന്നു. കോരാപുട്ടിലെ കോഫി അങ്ങേയറ്റം രൂചികരമാണ്. അത് ഒഡിഷയുടെ അഭിമാനമാണ്.”- മോദി പറഞ്ഞു.
മോദിയുടെ ഈ പരാമര്ശം കേട്ട കോരാപുട്ട് ജില്ലാ കളക്ടര് മനോജ് സത്യവാന് മഹാജന് അങ്ങേയറ്റം സന്തുഷ്ടനാണ്. “ഇത് ഈ ജില്ലയ്ക്കും ഇവിടുത്തെ കാപ്പികൃഷിയുമായി നേരിട്ടും പരോക്ഷമായും ബന്ധപ്പെട്ടിരിക്കുന്നവര്ക്കുള്ള പ്രചോദനമാണ്. “– കളക്ടര് മനോജ് സത്യവാന് മഹാജന് പറഞ്ഞു.
