നവരാത്രിയുടെ ഒമ്പതാമത്തെ ദിവസം(മഹാനവമി) ആരാധിക്കേണ്ട ദേവിയാണ് സിദ്ധിദാത്രി. പരമശിവന് എട്ടു സിദ്ധികളും പ്രദാനം ചെയ്തത് സിദ്ധിദാത്രി ദേവിയാണ്. ദാത്രി എന്ന സംസ്‌കൃതവാക്കിന്റെ അര്‍ത്ഥം ദാനം ചെയ്യുന്നവള്‍ എന്നാണ്.
അഷ്ടൈശ്വര്യസിദ്ധികള്‍ ഇവയാണ്. അണിമ, മഹിമ, ഗരിമ, ലഘിമ, പ്രാപ്തി, പ്രാ
കാമ്യം, ഈശിത്വം, വശിത്വം. കൂടാതെ ദൂരദര്‍ശനം, ദൂരശ്രവണം, പരകായപ്രവേശം, വാഗ്‌സിദ്ധി എന്നിങ്ങനെ പത്തോളം സിദ്ധികളും ദേവി പരമശിവനു ദാനം ചെയ്തു. പരാശക്തിയുടെ ഇച്ഛപ്രകാരം സിദ്ധിദാത്രി ശിവന്റെ ശരീരത്തിന്റെ ഇടത്തുഭാഗത്ത് പ്രവേശിച്ച് അര്‍ദ്ധനാരീശ്വരരൂപത്തില്‍ പരിണമിച്ചു. വിവാഹശേഷം പുരുഷന്റെ പകുതി ശരീരം സ്ത്രീയുടേതാണെന്നും സ്ത്രീയുടെ പകുതി ശരീരം പുരുഷന്റെതാണെന്നും ഉള്ള തത്ത്വം ലോകത്തുള്ള സ്ത്രീപുരുഷന്മാര്‍ മനസ്സിലാക്കേണ്ടതാണ്. ഇക്കാര്യം മനസ്സിലാക്കിയാല്‍ സ്ത്രീപീഡനവും ഗാര്‍ഹികപീഡനവും പോലുള്ള അധാര്‍മ്മിക പ്രവര്‍ത്തികള്‍ ലോകത്ത് ഉണ്ടാകുകയില്ല.
ചതുര്‍ഭുജയായ ദേവിയുടെ രണ്ടു കൈകളില്‍ ചക്രവും ശംഖും ധരിച്ചിരിക്കുന്നു.
മറ്റു രണ്ടു കൈകളില്‍ ഗദയും താമരപ്പൂവും ധരിച്ചിരിക്കുന്നു. ദേവി, താമരപ്പൂവിനെയാണ് ആസ്ഥാനമാക്കിയിരിക്കുന്നത്. ഭക്തര്‍ക്ക് അവരുടെ കര്‍മ്മമേഖലയില്‍ സിദ്ധി ലഭിക്കുന്നതിന് നവരാത്രിയിലെ നവമി ദിവസം സിദ്ധിദാത്രിയെ ആരാധിക്കേണ്ടതാണ്. നിത്യവും ഈ ദേവീരൂപത്തെ ധ്യാനിക്കുകയും വേണം. സിദ്ധി ലഭിക്കണമെങ്കില്‍ ശരീരശുദ്ധിയും മനഃശുദ്ധിയും വേണം. ഈ തത്ത്വ സന്ദേശമാണ് സിദ്ധിധാത്രി ഭക്തന്മാര്‍ക്കു നല്‍കുന്നത്.
നവരാത്രിയിലെ ഒമ്പതു ദേവിമാരേയും ആരാധിച്ച് ശരീരമനോബുദ്ധികളെ നവീകരിച്ച് സാധനാബലം നേടി കര്‍മ്മം ചെയ്യുന്നവര്‍ക്ക് അനുകൂല ഫലങ്ങള്‍ ലഭിക്കുന്നു. അവരുടെകൂടെ നവദുര്‍ഗ്ഘകളും ഉണ്ടാകും.ഒമ്പതു ശക്തി സ്വരൂപിണികളെ ഓര്‍മ്മിക്കുവാന്‍ സഹായിക്കുന്ന ദേവീമാഹാത്മ്യത്തിലെ ശ്ലോകം ഇങ്ങനെ:
പ്രഥമം ശൈലപുത്രീതി
ദ്വിതീയം ബ്രഹ്‌മചാരിണീ
തൃതീയം ചന്ദ്രഘണ്ടേതി
കൂശ്മാണ്ഡേതി ചതുര്‍ത്ഥകം
പഞ്ചമാ സ്‌കന്ദമാതേതി
ഷഷ്ഠം കാത്യായനീതിച
സപ്തമം കാളരാത്രീതി
മഹാഗൗരീതി ചാഷ്ടമം
നവമം സിദ്ധിദാ പ്രോക്താ
നവദുര്‍ഗ്ഗാ പ്രകീര്‍ത്തിതാ
ഉക്താദന്യതാനി നാമാനി
ബ്രഹ്‌മണൈവ മഹാത്മനാ
നവരാത്രികാലത്ത് രണ്ടു വയസ് തികഞ്ഞവരും 11 വയസ് പൂര്‍ത്തിയാകാത്തവരുമായ കുമാരിമാരെ പൂജിക്കണമെന്ന് വ്യാസമഹര്‍ഷി ദേവീഭാഗവത്തില്‍ പറയുന്നു.
