കരുനാഗപ്പള്ളി: സമ്പൂര്ണമായ വിജയത്തിന്റെയും പൂര്ണതയുടെയും പ്രതീകമാണ് വിജയദശമിയെന്നും അധര്മത്തിന്റെ മേലുള്ള ധര്മത്തിന്റെയും അജ്ഞാനത്തിന്റെ മേലുള്ള ജ്ഞാനത്തിന്റെയും വിജയമാണിതെന്നും അമൃതപുരി ആശ്രമത്തില് നടന്ന വിജയദശമിദിന സന്ദേശത്തില് മാതാ അമൃതാനന്ദമയി ദേവി പറഞ്ഞു.
ഈ യുദ്ധം ബാഹ്യമെന്നതില് ഉപരി ആന്തരികമാണ്. നമ്മുടെ ഉള്ളില് അനുനിമിഷം നടന്നുകൊണ്ടിരിക്കുന്ന യുദ്ധമാണിത്. അതുകൊണ്ടുതന്നെ ആഘോഷം എന്നതിലുപരി നവരാത്രി വ്രതത്തിന്റെയും തപസിന്റെയും സാധനയുടെയും കാലമാണെന്നും അമ്മ പറഞ്ഞു.
വിജയദശമി ദിനത്തില് കാലത്ത് ആശ്രമത്തിലെ പ്രധാന പ്രാര്ത്ഥനാ ഹാളില് ആരംഭിച്ച പരിപാടികളില് വിദേശികള് ഉള്പ്പെടെ ആയിരക്കണക്കിന് ഭക്തരാണ് പങ്കെടുത്തത്. വിദ്യാരംഭ ചടങ്ങില് അമ്മ നൂറുകണക്കിന് കുരുന്നുകള്ക്ക് ആദ്യക്ഷരം കുറിക്കുകയും ഹരിഃശ്രീ ചൊല്ലിക്കൊടുക്കുകയും ചെയ്തു. വിശ്വശാന്തിക്കായുള്ള ധ്യാനം, ഭജന എന്നിവയും അമ്മയുടെ നേതൃത്വത്തില് നടന്നു. സംഗീതോപാസകര് അവതരിപ്പിച്ച നാദോപാസന ശ്രദ്ധേയമായി. വിദ്യാര്ത്ഥികളുടെയും ആശ്രമ അന്തേവാസികളുടെയും വിവിധ കലാപരിപാടികളും അരങ്ങേറി. കഴിഞ്ഞ ഒമ്പത് ദിവസങ്ങളിലായി ആശ്രമത്തിലെ കാളീക്ഷേത്രത്തിലും കളരിയിലും അമൃത വിശ്വവിദ്യാപീഠം അമൃതപുരി കാമ്പസിലും നടന്ന നവരാത്രി ആഘോഷങ്ങളാണ് വിജയദശമി ദിനത്തില് സമാപിച്ചത്.
