ന്യൂദല്‍ഹി: രാഹുല്‍ ഗാന്ധി ജയിച്ച റായ് ബറേലി ലോക് സഭാ മണ്ഡലത്തില്‍ രണ്ട് ലക്ഷത്തില്‍പ്പരം വ്യാജവോട്ടര്‍മാരെ ചേര്‍ത്തുവെന്ന് ബിജെപി എംപി അനുരാഗ് താക്കൂര്‍. 71977 വ്യാജമേല്‍വിലാസങ്ങള്‍ വോട്ടര്‍പട്ടികയില്‍ ചേര്‍ക്കപ്പെട്ടുവെന്നും അനുരാഗ് താക്കൂര്‍ ആരോപിച്ചു.
ഈ വോട്ട് കൊള്ളകളുടെ പേരില്‍ രാജിവെയ്‌ക്കാന്‍ രാഹുല്‍ ഗാന്ധി തയ്യാറാകുമോ എന്നും അനുരാഗ് താക്കൂര്‍ വെല്ലുവിളിച്ചു. 19512 ഡ്യൂപ്ലിക്കേറ്റ് വോട്ടര്‍മാരും റായ് ബറേലിയില്‍ ഉണ്ടായിരുന്നുവെന്നും അനുരാഗ് താക്കൂര്‍ പറഞ്ഞു.
റായ് ബറേലിയിലെ വ്യാജ മേല്‍വിലാസങ്ങളുമായി ബന്ധപ്പെട്ട് 52000 വ്യാജ ജനനസര്‍ട്ടിഫിക്കറ്റുകള്‍ ഉണ്ടാക്കപ്പെട്ടിട്ടുണ്ടെന്നും അനുരാഗ് താക്കൂര്‍ ആരോപിച്ചു. 2024ലെ ലോക് സഭാ തെരഞ്ഞെടുപ്പില്‍ മൂന്ന് ലക്ഷത്തി തൊണ്ണൂറായിരം വോട്ടുകളുടെ ഭൂരിപക്ഷത്തിനാണ് രാഹുല്‍ ഗാന്ധി റായ് ബറേലി മണ്ഡലത്തില്‍ വിജയിച്ചത്. പരമ്പരാഗതമായി ഗാന്ധി കുടുംബത്തിന്റെ മണ്ഡലമായി അറിയപ്പെടുന്ന ഇടമാണ് റായ് ബറേലി.
