തിരുവനന്തപുരം:തിരുവനന്തപുരം ഡിസിസി അധ്യക്ഷന്റെ താല്‍ക്കാലിക ചുമതല കെപിസിസി ഉപാധ്യക്ഷന്‍ എന്‍.ശക്തന് നല്‍കി. കെപിസിസി പ്രസിഡന്റ് സണ്ണി ജോസഫ് എംഎല്‍എ ആണ് ഇക്കാര്യം അറിയിച്ചത്. പ്രാദേശിക കോണ്‍ഗ്രസ് നേതാവുമായുളള ഫോണ്‍ സംഭാഷണം പുറത്തായതിന് പിന്നാലെ പാലോട് രവി രാജിവെച്ചതോടെയാണ് എന്‍ ശക്തന് താല്‍ക്കാലിക ചുമതല നല്‍കിയത്.
തദ്ദേശ തെരഞ്ഞെടുപ്പിനുള്ള വോട്ടര്‍ പട്ടികയില്‍ പേരു ചേര്‍ക്കല്‍ അടക്കമുള്ളതിനാലാണ് പെട്ടെന്ന് എന്‍ ശക്തന് താല്‍ക്കാലിക ചുമതല നല്‍കിയത്. പുതിയ ഡിസിസി അധ്യക്ഷനെ പുനഃസംഘടനക്കൊപ്പം തീരുമാനിക്കാനാണ് ആലോചന. അതുവരെ എന്‍ ശക്തന് തന്നെ താല്‍ക്കാലി ചുമതലയില്‍ തുടരും.
അതിനിടെ, ഡിസിസി അധ്യക്ഷ പദവിയില്‍ നിന്നും പാലോട് രവി രാജിവച്ചത് കെപിസിസി പ്രസിഡന്റ് സണ്ണി ജോസഫ് ആവശ്യപ്പെട്ടത് പ്രകാരമെന്നാണ് വിവരം. ഫോണ്‍ സംഭാഷണം പുറത്തുവന്നതിനെ കുറിച്ച് വിശദീകരണം പാലോട് രവി നല്‍കിയെങ്കിലും എഐസിസി നിര്‍ദേശപ്രകാരം രാജിക്കത്ത് നല്‍കാന്‍ കെപിസിസി അധ്യക്ഷന്‍ ആവശ്യപ്പെടുകയായിരുന്നു.
തദ്ദേശ തെരഞ്ഞെടുപ്പില്‍ കോണ്‍ഗ്രസ് മൂന്നാം സ്ഥാനത്തേക്ക് പോകുമെന്നും നിയമസഭയില്‍ ഇടതുമുന്നണിക്ക് തുടര്‍ഭരണം ലഭിക്കുമെന്നാണ് ഫോണ്‍ സംഭഷണത്തില്‍ പാലോട് രവി പറഞ്ഞത്.കോണ്‍ഗ്രസ് പ്രവര്‍ത്തകര്‍ ബി ജെ പിയിലേക്ക് പോകുമെന്നും പറഞ്ഞു.
