ന്യൂദല്‍ഹി: അടിയന്തരാവസ്ഥക്കും ഭരണഘടനയുടെ ആത്മാവിനെ അട്ടിമറിക്കാനുള്ള ശ്രമത്തിനുമെതിരെ ധീരമായി പേരാടിയവര്‍ക്ക് പ്രധാനമന്ത്രി നരേന്ദ്രമോദിയുടെ അധ്യക്ഷതയില്‍ ചേര്‍ന്ന കേന്ദ്രമന്ത്രിസഭായോഗം ആദരവും ശ്രദ്ധാഞ്ജലിയുമര്‍പ്പിച്ചു.
ഭരണഘടനാനുസൃതമായ ജനാധിപത്യ അവകാശങ്ങള്‍ എടുത്തുകളഞ്ഞതിനെത്തുടര്‍ന്ന്, ഭരണകൂട ഭീകരതയ്‌ക്ക് ഇരയായവര്‍ക്ക് ആദരമര്‍പ്പിച്ച് രണ്ടു മിനിറ്റ് മൗനം ആചരിച്ചു.
2025ല്‍ ഭരണഘടനഹത്യാ ദിനത്തിന് 50 വര്‍ഷം തികയുക യാണ്. ഭരണഘടനയെ അട്ടിമറിക്കുകയും ജനാധിപത്യത്തെ ആക്രമിക്കുകയും ഫെഡറലിസം തകര്‍ക്കുകയും മൗലികാവകാശങ്ങള്‍, മനുഷ്യസ്വാതന്ത്ര്യം, അന്തസ് എന്നിവയ്‌ക്ക് താത്കാലിക അന്ത്യം കുറിക്കുകയും ചെയ്ത ഭാരതചരിത്രത്തിലെ ഇരുളടഞ്ഞ അധ്യായമാണത്.
ഭരണഘടനയിലും ജനാധിപത്യമൂല്യങ്ങളിലും ജനങ്ങള്‍ അചഞ്ചലമായ വിശ്വാസം പുലര്‍ത്തുന്നുണ്ടെന്ന് കേന്ദ്രമന്ത്രിസഭായോഗം ചൂണ്ടിക്കാട്ടി. സ്വേച്ഛാധിപത്യ പ്രവണതകള്‍ ചെറുക്കുകയും ഭരണഘടനയെയും ജനാധിപത്യഘടനയെയും സംരക്ഷിക്കാന്‍ ഉറച്ചുനില്‍ക്കുകയും ചെയ്തവരില്‍നിന്ന് പ്രചോദനം ഉള്‍ക്കൊള്ളണം. പഴയ തലമുറയ്‌ക്കൊപ്പം പുതുതലമുറയും പങ്കുവഹിക്കണം.
ജനാധിപത്യത്തിന്റെ അമ്മയായ ഭാരതം, ഭരണഘടനാ മൂല്യങ്ങള്‍ സംരക്ഷിക്കാനും നിലനിര്‍ത്താനും മാതൃകയായി നിലകൊള്ളും. ഭരണഘടനയും ജനാധിപത്യ- ഫെഡറല്‍ മനോഭാവവും ഉയര്‍ത്തിപ്പിടിക്കണം.
