ധാക്ക : ബംഗ്ലാദേശിലെ ദിനാജ്പൂരിലെ ഒരു തടാകത്തിൽ നിന്ന് വിഷ്ണു വിഗ്രഹം കണ്ടെത്തി. കഴിഞ്ഞ നാല് വർഷത്തിനിടെ ബംഗ്ലാദേശിലെ മണ്ണിലും തടാകങ്ങളിലും വിഷ്ണു വിഗ്രഹം കണ്ടെത്തിയ നാലാമത്തെ സംഭവമാണിത്.
ദിനാജ്പൂരിലെ നവാബ്ഗഞ്ചിൽ ഒരു തടാകം കുഴിക്കാനുള്ള ജോലി നടന്നുകൊണ്ടിരുന്നു. ഈ സമയത്ത് സാമാന്യം വലിപ്പമുള്ള ഒരു വിഷ്ണു വിഗ്രഹം കണ്ടെത്തിയത്. വിഗ്രഹത്തിന് 27 കിലോ ഭാരം ഉണ്ടായിരുന്നു. വിഗ്രഹത്തിൽ വിഷ്ണുവിനൊപ്പം ദേവി ലക്ഷ്മിയുടെ ഒരു ചിത്രം കൊത്തിവച്ചിരുന്നു. പ്രദേശത്തെ മണ്ണ് ബുൾഡോസർ ഉപയോഗിച്ച് കുഴിച്ചെടുക്കുന്നുണ്ടെങ്കിലും വിഗ്രഹത്തിന് കേടുപാടുകൾ സംഭവിച്ചിട്ടില്ലായിരുന്നു.
പ്രാദേശിക പോലീസ് നൽകിയ വിവരങ്ങൾ പ്രകാരം വിഗ്രഹം പിന്നീട് ട്രഷറിയിലേക്ക് അയച്ചു. അവിടെ നിന്ന് പുരാവസ്തു വകുപ്പിന് അയയ്‌ക്കും. പുരാവസ്തു വകുപ്പ് അത് പരിശോധിച്ച് വിഗ്രഹം എപ്പോൾ നിർമ്മിച്ചുവെന്ന് പറയുമെന്നാണ് വിവരം.
നേരത്തെ 2023-ൽ ഫരീദ്പൂരിലും വിഷ്ണുവിന്റെ വിഗ്രഹം കണ്ടെത്തിയിരുന്നു. വിഗ്രഹത്തിന് 32 കിലോ ഭാരം ഉണ്ടായിരുന്നു. 2021 ഓഗസ്റ്റിൽ ബംഗ്ലാദേശിൽ 1000 വർഷം പഴക്കമുള്ള മറ്റൊരു വിഷ്ണു വിഗ്രഹവും കണ്ടെത്തി.
അതേ സമയം പുരാതന കാലത്ത് ഒട്ടനവധി ബംഗാളി ഹിന്ദു കുടുംബങ്ങൾ ബംഗ്ലാദേശിന്റെ ഈ ഭാഗങ്ങളിൽ താമസിച്ചിരുന്നു. അവരുടെ ജനസംഖ്യ കുറഞ്ഞതോടെ അവരുടെ ക്ഷേത്രം നശിപ്പിക്കപ്പെടുകയും അവരുടെ ദേവതകളുടെ വിഗ്രഹങ്ങൾ കുഴിച്ചിടുകയും ചെയ്തുവെന്നുമാണ് ചരിത്രരേഖകൾ പറയുന്നത്. ഇപ്പോൾ ഖനനത്തിനിടെ ഈ വിഗ്രഹങ്ങളാണ് കണ്ടെടുക്കപ്പെടുന്നത്.
