ബെയ്‌റൂട്ട്: തെക്കന്‍ ലെബനനില്‍ ഇസ്രയേല്‍ വിമാനങ്ങളുടെ ബോംബാക്രമണം. പേജര്‍ ,വാക്കി ടോക്കി സ്‌ഫോടനങ്ങള്‍ക്ക് പിന്നാലെയാണ് ബോംബാക്രമണം.വാക്കി ടോക്കി സ്‌ഫോടനങ്ങളില്‍ 20 പേരാണ് മരിച്ചത്.
പേജര്‍ ആക്രമണത്തെ തുടര്‍ന്നാണ്് ലബനനിലെ ഹിസ്ബുള്ള ഭീകരരെ ലക്ഷ്യമിട്ട് വാക്കി ടോക്കി സ്‌ഫോടനങ്ങള്‍ ഉണ്ടായത്. ലബനനിലുടനീളം സായുധ സംഘടന ഹിസ്ബുള്ളയുടെ വാക്കിടോക്കികള്‍ പൊട്ടിത്തെറിച്ചു.
കാറുകളിലും വീടുകളിലും മൃതദേഹങ്ങളുടെ സംസ്‌കാരച്ചടങ്ങിലും വാക്കി ടോക്കികള്‍ പൊട്ടിത്തെറിച്ചു. തലസ്ഥാനമായ ബെയ്‌റൂട്ടില്‍ ഒട്ടേറെ സ്‌ഫോടനങ്ങളുണ്ടാവുകയും നിരവധി ആളുകള്‍ക്ക് പരിക്കേല്‍ക്കുകയും ചെയ്തു.
ചൊവ്വാഴ്ച ഹിസ്ബുള്ള ഭീകരരുടെ 3000ത്തോളം പേജറുകള്‍ പൊട്ടിത്തെറിച്ചതിനെ തുടര്‍ന്ന് 12 പേരാണ് മരിച്ചത്. ആശുപത്രികളില്‍ 2750 പേരാണ് ചികിത്സയിലുളളത്. രണ്ട് ദിവസത്തെ ആക്രമണത്തില്‍ ഹിസ്ബുള്ളയുടെ ആശയവിനിമയ സംവിധാനങ്ങള്‍ അപ്പാടെ തകരാറിലായെന്ന് റിപ്പോര്‍ട്ടുകളില്‍ പറയുന്നു. ജനങ്ങള്‍ ഫോണുകള്‍ അടക്കം ഉപയോഗിക്കാന്‍ ഭയക്കുന്നതായും റിപ്പോര്‍ട്ടുണ്ട്.
ഇസ്രേലി ചാരസംഘടനയായ മൊസാദ് ആണ് ആക്രമണത്തിനു പിന്നിലെന്ന് റിപ്പോര്‍ട്ടുകള്‍. ആരോപണം ഇസ്രായേല്‍ നിഷേധിച്ചിട്ടില്ല.
