മുംബൈ: നടന്‍ ആമിര്‍ഖാന്റെ 59 വയസ്സായെന്നും ഇനിയും പെണ്ണുകെട്ടണമെന്നുമുള്ള പ്രസ്താവന സമൂഹമാധ്യമങ്ങളില്‍ കടുത്ത വിമര്‍ശനം നേരിടുകയാണ്. രണ്ട് തവണ പെണ്ണുകെട്ടുകയും രണ്ടുപേരുമായും പിരിയുകയും ചെയ്ത ആളാണ് ആമിര്‍ഖാന്‍. മുഹമ്മദ് ആമിര്‍ ഹുസൈന്‍ ഖാന് എന്നാണ് മുഴുവന്‍ പേര്.
1986ലായിരുന്നു ആമിര്‍ഖാന്റെ ആദ്യവിവാഹം. റീന ദത്ത എന്ന നടിയുമായിട്ടായിരുന്നു ഈ വിവാഹം. ഇതില്‍ രണ്ട് മക്കളുണ്ടായി- ഇറാ ഖാനും ജുനൈദ് ഖാനും. 16 വര്‍ഷം നീണ്ട വിവാഹജീവിതത്തിന് ശേഷം 2002ല്‍ ഇരുവരും വഴി പിരിഞ്ഞു.
2005ല്‍ ആമിര്‍ ഖാന് രണ്ടാമതും വിവാഹിതനായി. കിരണ്‍ റാവു എന്ന എഴുത്തുകാരിയും തിരക്കഥാകൃത്തുമായിട്ടായിരുന്നു രണ്ടാമത്തെ വിവാഹം. ഇതില്‍ ആസാദ് എന്ന ഒരു മകനുണ്ട്. പക്ഷെ 16 വര്‍ഷത്തെ വിവാഹബന്ധത്തിന് ശേഷം 2021ല്‍ ഇരുവരും തമ്മില്‍ പിരിഞ്ഞു. കിരണ്‍ റാവു സംവിധാനം ചെയ്ത ലപാത ലേഡീസ് എന്ന സിനിമ നിര്‍മ്മിച്ചത് ആമിര്‍ ഖാനായിരുന്നു.
ഇപ്പോള്‍ ആമിര്‍ ഖാന് 59 വയസ്സായി. രണ്ടു വിവാഹങ്ങളും പരാജയമായിരുന്നെങ്കിലും ഒറ്റയ്‌ക്കുള്ള ജീവിതം മടുപ്പിക്കുന്നെന്നും ജീവിതത്തില്‍ ഒരു പങ്കാളിയെ താന്‍ ആഗ്രഹിക്കുന്നുണ്ടെന്നും ആമിര്‍ഖാന്‍ പറഞ്ഞു. ലാല്‍ സിങ്ങ് ഛദ, പികെ തുടങ്ങി അവസാനത്തെ പല സിനിമകളും ബോക്സോഫീസില്‍ തലകുത്തി വീണത് ആമിര്‍ഖാനെ മാനസികമായി തളര്‍ത്തിയിരുന്നു.
കേതന്‍ മേത്തയുടെ ഹോളി എന്ന സിനിമയിലൂടെ ബോളിവുഡില്‍ എത്തിയ ആമിര്‍ഖാന്‍ ഖയാമത് സെ ഖയാമത് തക്, ജോ ജീതാ വഹി സിക്കന്ദര്‍, രംഗീല, രാജാ ഹിന്ദുസ്ഥാനി, ഗുലാം, സര്‍ഫറോഷ്, എന്നീ സിനിമകളിലൂടെ പ്രസിദ്ധതാരമായി. പിന്നീട് ദില്‍ ചാഹ്താ ഹെ, രംഗ് ദേ ബസന്തി, താരേ സമീന്‍ പര്‍, ഗജിനി, 3 ഇഡിയറ്റ്സ് എന്നീ സിനിമകളിലൂടെ സൂപ്പര്‍ താരമായി.
