നാഗര്‍കോവില്‍: ഡിഎംകെയും എഐഡിഎംകെയും തമിഴ്‌നാട്ടില്‍ അഴിമതി നടത്തി പണം കൈക്കലാക്കിയെന്ന് കേന്ദ്രആഭ്യന്തര മന്ത്രി അമിത് ഷാ.
തമിഴിനെ ഭാരതത്തില്‍ മാത്രമല്ല ലോകം മുഴുവന്‍ മോദി ഉയര്‍ത്തി. തമിഴ്‌നാട്ടില്‍ വികസനം ഇല്ലാതാക്കി. രാമക്ഷേത്രത്തെയും സനാതന ധര്‍മ്മത്തേയും മോശം പരാമര്‍ശം നടത്തി ഹിന്ദുക്കളുടെ മതവികാരം വ്രണപ്പെടുത്തിയവരെ തിരിച്ചറിയണമെന്നും അമിത് ഷാ പറഞ്ഞു. ബിജെപി സ്ഥാനാര്‍ത്ഥി പൊന്‍ രാധാകൃഷ്ണന്റെയും ഉപതെരഞ്ഞടുപ്പ് നടക്കുന്ന വിളവന്‍കോട് നിയമസഭാ മണ്ഡലത്തിലെ ബിജെപി സ്ഥാനാര്‍ത്ഥി നന്ദിനിയുടെയും തെരഞ്ഞടുപ്പ് പ്രചാരണത്തിന്റെ ഭാഗമായി നടന്ന റോഡ് ഷോയ്‌ക്കു ശേഷം സംസാരിക്കുകയായിരുന്നു അമിത് ഷാ. മൂന്നാം തവണയും പ്രധാനമന്ത്രി പദത്തില്‍ മോദി എത്തുമ്പോള്‍ പൊന്‍ രാധാകൃഷ്ണനും പാര്‍ലമെന്റില്‍ എത്തണം. ഇത്തവണ 400 സീറ്റിലധികം ബിജെപി വിജയിക്കുമെന്നും അതില്‍ ഒന്ന് കന്യാകുമാരി ആകണമെന്നും അമിത് ഷാ പറഞ്ഞു.
കന്യാകുമാരി പാര്‍ലമെന്റ് മണ്ഡലത്തിലെ വോട്ടര്‍മാരെ ആവേശഭരിതമാക്കി, തക്കല മേട്ടുക്കട ജങ്ഷനില്‍ നിന്നും തുടങ്ങിയ റോഡ് ഷോ ഒരു കിലോമീറ്റര്‍ പിന്നിട്ട് പഴയ ബസ് സ്റ്റാന്‍ന്റില്‍ അവസാനിച്ചു. ഇന്നലെ രാവിലെ 11.30ന് നാഗര്‍കോവില്‍ മറവന്‍ കുടിയിലെ എആര്‍ ക്യാമ്പില്‍ ഹെലികോപ്റ്ററില്‍ ഇറങ്ങിയ ആഭ്യന്തര മന്ത്രി റോഡ് മാര്‍ഗമാണ് തക്കല മേട്ടുക്കടയില്‍ എത്തിയത്. അവിടെ നിന്നും തുറന്ന വാഹനത്തിലായിരുന്നു റോഡ്‌ഷോ നടന്നത്. ജില്ലയുടെ വിവിധ ഭാഗങ്ങളില്‍ നിന്നും വേനല്‍ച്ചൂടിനെ അവഗണിച്ച് ആവേശത്തോടെ ആയിരങ്ങള്‍ ഒഴുകി എത്തിയതോടെ റോഡ് ഷോ ചരിത്രമായി.
പാര്‍ലമെന്റ് സ്ഥാനാര്‍ത്ഥി പൊന്‍ രാധാകൃഷ്ണന്‍, വിളവന്‍കോട് നിയമസഭാ സ്ഥാനാര്‍ത്ഥി നന്ദിനി, എം.ആര്‍.ഗാന്ധി എംഎല്‍എ, ബിജെപി കന്യാകുമാരി ജില്ലാ പ്രസിഡന്റ് ധര്‍മ്മരാജ് തുടങ്ങിയവര്‍ അമിത്ഷായോടൊപ്പം വാഹനത്തിന്‍ ഉണ്ടായിരുന്നു.
