തിരുവനന്തപുരം : ചൊവ്വരയില് നാല് കിലോ കഞ്ചാവുമായി അഞ്ച് പേര് അറസ്റ്റിലായി. നെയ്യാറ്റിന്കര എക്സൈസും മൊബൈല് ഇന്റര്വെന്ഷന് യൂണിറ്റും സംയുക്തമായാണ് ഇവരെ അറസ്റ്റ് ചെയ്തത്. കാട്ടാക്കട സ്വദേശി ശരത് (26), പേരേക്കോണം സ്വദേശികളായ വിഷ്ണു (23), ശ്രീരാഗ് (27), അജി ജോര്ജ് (28), പാറശ്ശാല സ്വദേശി വിവിന് (26) എന്നിവരാണ് അറസ്റ്റിലായത്.
പ്രതികളെ മജിസ്ട്രേറ്റിന് മുന്നില് ഹാജരാക്കിയ ശേഷം റിമാന്ഡ് ചെയ്തു.കോവളത്തേക്ക് തമിഴ്നാട്ടില് നിന്ന് കാറില് കഞ്ചാവ് കടത്തുന്നുണ്ടെന്ന രഹസ്യവിവരമനുസരിച്ചായിരുന്നു പരിശോധന. പ്രതികള് സഞ്ചരിച്ചിരുന്ന കാര് ചൊവ്വരയില് തടഞ്ഞുനിര്ത്തി പരിശോധിച്ചപ്പോഴാണ് കഞ്ചാവ് കണ്ടെത്തിയത്.
പാച്ചല്ലൂര്, വെങ്ങാനൂര്, വിഴിഞ്ഞം, കോവളം, തീരദേശ മേഖലകളില് ചില്ലറ വില്പന നടത്തുന്നതിനാണ് കഞ്ചാവ് കൊണ്ടുവന്നതെന്ന് പ്രതികള് എക്സൈസിനോട് പറഞ്ഞു.
