പത്തനംതിട്ട : ആലപ്പുഴയില്‍ കഴിഞ്ഞ ദിവസം നടത്തിയ വാര്‍ത്താ സമ്മേളനത്തില്‍ അസഭ്യം പ്രയോഗം നടത്തിയെന്ന വാര്‍ത്ത വസ്തുതാ വിരുദ്ധമെന്ന് കെ പി സി സി അധ്യക്ഷന്‍ കെ സുധാകരന്‍. മാധ്യമപ്രവര്‍ത്തകരോട് ‘മര്യാദകേട്’ കാണിക്കരുത് എന്നാണ് പറഞ്ഞത്.
‘മര്യാദകേട്’ എന്ന വാക്ക് വളച്ചൊടിച്ചാണ് തന്നെ ആക്ഷേപിക്കുന്നതെന്ന് സുധാകരന്‍ പറഞ്ഞു. പ്രചരിക്കുന്ന ആ വാക്ക് ജീവിതത്തില്‍ എവിടെയും താന്‍ ഉപയോഗിച്ചിട്ടില്ല. പ്രചാരണം ഏറെ വേദനിപ്പിച്ചുവെന്നും സുധാകരന്‍ കൂട്ടിച്ചേര്‍ത്തു. പ്രതിപക്ഷ നേതാവ് വി.ഡി. സതീശനും താനുമായി ഒരു തര്‍ക്കവുമില്ലെന്നും സുധാകരന്‍ വ്യക്തമാക്കി.
വാര്‍ത്താസമ്മേളനത്തില്‍ പ്രതിപക്ഷ നേതാവ് വി ഡി സതീശനെ കാത്തിരുന്ന് മുഷിഞ്ഞപ്പോള്‍ സുധാകരന്‍ അസഭ്യം പറഞ്ഞെന്നാണ് വാര്‍ത്ത പുറത്തുവന്നത്. പത്രക്കാരെ വിളിച്ചിരുത്തിയിട്ട് സമയത്ത് എത്താതിരുന്നതിനെ വിമര്‍ശിക്കുമ്പോള്‍ സമീപമുണ്ടായിരുന്ന ഡി സി സി പ്രസിഡന്റ് ബാബു പ്രസാദും ഷാനിമാള്‍ ഉസ്മാനും അനുനയിപ്പിക്കാന്‍ ശ്രമിക്കുന്നത് കാണാമായിരുന്നു. ചാനല്‍ ക്യാമറകളും മൈക്കും ഓണ്‍ ആണെന്നും നേതാക്കള്‍ സുധാകരനോട് പറയുന്നത് കേള്‍ക്കാമായിരുന്നു. ഇതിനിടെയാണ് സുധാകരന്‍ അസഭ്യ പ്രയോഗം നടത്തിയെന്നായിരുന്നു വാര്‍ത്ത.
