തിരുവനന്തപുരം: ദേശീയ ആശയങ്ങള്‍ക്കായി അതിതീവ്രവും പ്രതികൂലമായ സാഹചര്യത്തില്‍ പ്രവര്‍ത്തിക്കുന്നവരാണ് കേരളത്തിലെ ബിജെപിയെന്ന് പാര്‍ട്ടി ദേശീയ സംഘടന സെക്രട്ടറി ബി.എല്‍ സന്തോഷ്. ജിഹാദി വര്‍ഗീയ ചുറ്റുപാടിലും കുത്തഴിഞ്ഞ ഭരണകൂടത്തിനുമെതിരെയാണ് പ്രവര്‍ത്തകര്‍ പോരാടുന്നത്.
പ്രിയപ്പെട്ടവര്‍ കണ്‍മുന്നില്‍ വെട്ടേറ്റ് മരിക്കുന്ന സാഹചര്യങ്ങള്‍ ഉണ്ടാക്കുന്നു. നിരന്തരം ഭീഷണി നേരിടേണ്ടി വന്നിട്ടും സഞ്ചരിക്കുന്ന പാതകൈവെടിയാതെ അവര്‍ പ്രവര്‍ത്തിക്കുകയാണ്. സ്വാര്‍ത്ഥവും രാഷ്‌ട്രീയവല്‍ക്കരിക്കപ്പെട്ടതുമായ ഭരണത്താല്‍ നൂറുകണക്കിന് കേസുകളാണ് പലര്‍ക്കെതിരേയും ചുമത്തപ്പെട്ടിരിക്കുന്നത്. അതൊന്നും ദേശീയ ബോധം ഉള്‍കൊണ്ടുള്ള കേരള ബിജെപിയുടെ പ്രവര്‍ത്തനങ്ങളെ തടയാനായിട്ടില്ലെന്നും അദേഹം ഫേസ്ബുക്കില്‍ കുറിച്ചു.
ദേശീയതയിലൂന്നി ചലിച്ചുകൊണ്ടേയിരിക്കാന്‍ ലക്ഷകണക്കിനുപേരെ പ്രേരിപ്പിക്കുന്ന ആയിരങ്ങളെ കേരളത്തില്‍ കാണാം. കല്ലും മുള്ളും നിറഞ്ഞ പാതയിലൂടെ മഹത്തായ ലക്ഷ്യത്തിനായി സഞ്ചരിക്കുന്നവര്‍ക്കൊപ്പം കൂടാന്‍ സാധിച്ചെന്നും അദേഹം പോസ്റ്റില്‍ പറഞ്ഞു.
