പാലക്കാട്:സിപിഎം പാലക്കാട് മുന്‍ ജില്ലാ സെക്രട്ടറി ഇ എന്‍ സുരേഷ് ബാബുവിനെതിരെ വിജിലന്‍സില്‍ പരാതി. സിഎംപി നേതാവ് വി മുസ്തഫയാണ് വിജിലന്‍സ് ആന്‍ഡ് ആന്റി കറപ്ഷന്‍ ബ്യൂറോ ഡയറക്ടര്‍ക്ക് പരാതി നല്‍കിയത്. അനധികൃത സ്വത്ത് സമ്പാദനം, സാമ്പത്തിക ഇടപാടുകള്‍, കള്ളപ്പണം വെളുപ്പിക്കല്‍, ബിനാമി നിക്ഷേപങ്ങള്‍ എന്നിവ സമഗ്രമായി അന്വേഷിക്കണമെന്നാണ് പരാതിയില്‍ പറയുന്നത്.
പാലക്കാട്ടെ മൂന്ന് സഹകരണ സ്ഥാപനങ്ങള്‍ കേന്ദ്രീകരിച്ച് വലിയ തോതില്‍ സാമ്പത്തിക ക്രമക്കേടുകള്‍ നടന്നിട്ടുണ്ടെന്ന് പരാതിയില്‍ ആരോപിക്കുന്നു.ചിറ്റൂര്‍ താലൂക്ക് ടൂറിസം കോ-ഓപ്പറേറ്റീവ് സൊസൈറ്റി ആന്‍ഡ് റിസര്‍ച്ച് സെന്റര്‍, പാലക്കാട് ജില്ലാ എന്‍ജിനീയറിംഗ് സഹകരണ സംഘം, ചിറ്റൂര്‍ താലൂക്ക് പ്രവാസി ക്ഷേമ സഹകരണ സംഘം എന്നിവയുടെ ഇടപാടുകളാണ് അന്വേഷണ പരിധിയില്‍ ഉള്‍പ്പെടുത്തണമെന്ന് ആവശ്യപ്പെട്ടിട്ടുള്ളത്.ഈ സഹകരണ സ്ഥാപനങ്ങളിലൂടെ ബിനാമി നിക്ഷേപങ്ങളും കണക്കില്‍പ്പെടാത്ത പണമിടപാടുകളും നടന്നിട്ടുണ്ടോയെന്ന് പരിശോധിക്കണം. കൂടാതെ വായ്‌പാ വിതരണത്തിലെ ക്രമക്കേടുകള്‍, സ്വത്ത് മൂല്യനിര്‍ണയത്തിലെ കൃത്രിമം, സ്ഥാപനങ്ങളുടെ ഫണ്ട് വഴിതിരിച്ചുവിടല്‍ എന്നിവയും അന്വേഷിക്കണമെന്നാണ് ആവശ്യം.
സുരേഷ് ബാബുവിന്റെയും കുടുംബാംഗങ്ങളുടെയും അടുത്ത ബന്ധുക്കളുടെയും പേരിലുള്ള നിക്ഷേപങ്ങള്‍, ലോക്കറുകള്‍, സ്ഥാവര സ്വത്തുക്കള്‍ എന്നിവയെക്കുറിച്ച് പരിശോധിക്കണം. വരുമാനത്തിന് ആനുപാതികമല്ലാത്ത സ്വത്ത് സമ്പാദനത്തില്‍ വിജിലന്‍സ് ഡയറക്ടര്‍ പ്രാഥമിക അന്വേഷണം നടത്തണമെന്നാണ് ആവശ്യം. അടുത്തിടെ, വിപുലീകൃത ജില്ലാ കമ്മിറ്റി ചേര്‍ന്നപ്പോള്‍ പാലക്കാട് ജില്ലാ സെക്രട്ടറി സ്ഥാനത്ത് നിന്ന് ഇ എന്‍ സുരേഷ് ബാബുവിനെ നീക്കിയിരുന്നു.ഇദ്ദേഹത്തിനെതിരെ ലൈംഗികാരോപണവും ഉണ്ടെന്നാണ് ആരോപണം.
