ഡോ സുകുമാര് കാനഡ
സ്വാമി അയ്യപ്പന് പലനാമങ്ങളില് അറിയപ്പെടുന്നു. ഹരിഹരസുതന്, ശ്രീധര്മ്മശാസ്താ, ശ്രീഭൂതനാഥന്, മണികണ്ഠന്, ശ്രീശബരീശന് എന്നിങ്ങനെയല്ലാം അയ്യപ്പനെ വിളിക്കുന്നു.
ഹരിഹരസുതന്: ഹരിയുടേയും ഹരന്റെയും പുത്രനാണ് അയ്യപ്പന്. മഹിഷീനിഗ്രഹത്തിനായാണ് അവതാരമെടുത്തതെങ്കിലും ശിവവിഷ്ണുസംയോഗത്താല് സമൂഹത്തില് മറ്റ ്പ്രയോജനങ്ങളും ഉണ്ടായി. ശൈവരും വൈഷ്ണവരും തമ്മിലുള്ള വൈരത്തിന് വലിയൊരളവുവരെ പരിഹാരമുണ്ടായി. ഒരേ പരംപൊരുളിന്റെ പ്രകടിതഭാവമാണ് ശിവനുംവിഷ്ണുവുമായി നിലകൊള്ളുന്നതെന്ന് ഭക്തര് മനസ്സിലാക്കി.
ശ്രീധര്മ്മശാസ്താ: ജനിച്ചപ്പോഴേ ശാസ്താവെന്ന നാമത്തോടെ, ധര്മ്മസംരക്ഷയ്ക്കായി നിലകൊണ്ട മൂര്ത്തിയാണ് ധര്മ്മശാസ്താ. ശാസ്താവെന്നാല് അനുസരിപ്പിക്കുന്നവന് എന്നും അര്ത്ഥമുണ്ട്. ധര്മ്മശാസ്താ അവതാരത്തിന്
പൂര്ണ്ണ, പുഷ്ക്കല എന്നിങ്ങനെ രണ്ട് ഭാര്യമാരും സത്യകന് എന്നൊരു പുത്രനുമുണ്ട്. ‘പൂര്ണ്ണ’മെന്നാല് അനന്തം.’പുഷ്ക്കല’യെന്നാല് ഐശ്വര്യം. ഇങ്ങനെ ഗൃഹസ്ഥനായ ധര്മ്മശാസ്താവിന്റെ പ്രതിഷ്ഠയുള്ള ക്ഷേത്രം ആര്യന്കാവിലാണ് ഉള്ളത്.
ശ്രീഭൂതനാഥന്: ശിവഗണങ്ങളിലൊരാളായി ശിവസേവ ചെയ്യുന്ന ഭൂതങ്ങളില് ഒന്നായിഭൂതനാഥന് വിളങ്ങുന്നു. പരമശിവന്റെ ഭൂതഗണനേതാവാണ ്ശ്രീഭൂതനാഥഭാവത്തിലുള്ള അയ്യപ്പന്.
മണികണ്ഠന്: പമ്പാനദിക്കരയില്വച്ച് പന്തള രാജാവ് അയ്യപ്പനെ കണ്ടുമുട്ടുമ്പോള് കഴുത്തില് പരമശിവന് നല്കിയ രത്നമണിമാലയുണ്ടായിരുന്നു. മാത്രമല്ല, അയ്യപ്പന്റെ നാദം മണിമുഴങ്ങുന്ന പോലെയായിരുന്നു എന്നും പറയപ്പെടുന്നു.
ശ്രീശബരീശന്: കാനനവാസിയായിരുന്ന ശബരി ശ്രീരാമ ഭക്തയായിരുന്നു. രാമായണത്തില് ശബരിയുടെ ചരിതം വിശദമായി പറയുന്നുണ്ട്. ശ്രീരാമചന്ദ്രനില്നിന്നും മോക്ഷം ലഭിക്കാന് ഭാഗ്യമുണ്ടായ ശബരി വസിച്ചിരുന്ന പരിപാവനമായ പ്രദേശമാണ് ശബരിമല. ശബരിമലയില് വാഴുന്ന അയ്യപ്പന് ശ്രീശബരീശനാകുന്നു.
ഈശ്വരന്, ഭഗവാന്: ഉത്തമങ്ങളായഎട്ടു യോഗ്യതകളും (ഭഗകള്) ഉള്ളയാളാണ് ഭഗവാന്. സൗന്ദര്യം, പ്രശസ്തി, ശക്തി, സമ്പത്ത്, ഈശത്വം, അറിവ്, സ്വാധീനം, ദയാവായ്പ് എന്നിവയിലെല്ലാം അഗ്രഗണ്യനാണ ്ഭഗവാന് അല്ലെങ്കില് ഈശ്വരന്. കലിയുഗത്തിലെ കണ്കണ്ട ദൈവമാണ് അയ്യപ്പന്.
സ്വാമിഅയ്യപ്പന്: സ്വാമിയെന്നാല് നാഥന്. അയ്യന് എന്നാല് ഗുരു. അപ്പനെന്നാല് പിതാവ്. ഈ സങ്കല്പ്പമെല്ലാം ഒന്നുചേര്ന്ന ദൈവമാണ് സ്വാമിഅയ്യപ്പന്. ഗുരുവും പിതാവുമായി ഭക്തനെ നയിക്കുന്ന ധര്മ്മശാസ്താവ് ശബരിമലയില് സ്വാമിഅയ്യപ്പനായിരിക്കുന്നു. തന്റെ ഭക്തരേയും അയ്യപ്പന്മാരാക്കാനായി ഭഗവാന് പ്രചോദനവും അറിവും നല്കി അനുഗ്രഹിക്കുന്നു. ഭക്തരായുള്ള മനുഷ്യരെ മാത്രമല്ല അവന്റെ ഇന്ദ്രിയങ്ങള്ക്കും ഭഗവാന് നിയന്ത്രണം നല്കുന്നു. സ്വയം അയ്യപ്പനാവാനും തത്ത്വമസിയെന്ന തത്വം പ്രത്യക്ഷമാക്കാ
നും ഭക്തനെ അനുഗ്രഹിക്കുന്നു. ശബരിമലയില് മാത്രമേ സ്വാമിഅയ്യപ്പന്റെ വിഗ്രഹമുള്ളൂ. മറ്റിടങ്ങളിലെല്ലാം പലഭാവങ്ങളിലുള്ള ധര്മ്മശാസ്താ പ്രതിഷ്ഠകളാണുള്ളത്.
