കൊല്ലം: കോവിഡ് പ്രതിരോധ പ്രവര്ത്തനങ്ങള് ശക്തമാക്കുന്നതിന്റെ ഭാഗമായി ശാസ്താംകോട്ടയില് 300 കിടക്കകളുള്ള രണ്ടു പ്രാഥമിക ചികിത്സാ കേന്ദ്രങ്ങള് സജ്ജമായി. 18ന് തുറക്കും.
ശാസ്താംകോട്ട എംസിഎംഎം ആശുപത്രിയുടെ എതിര്വശത്തുള്ള ലേഡീസ് ഹോസ്റ്റല്, മാര്ബസേലിയോസ് കോളേജിനോട് ചേര്ന്നുള്ള മെന്സ് ഹോസ്റ്റല് എന്നിവിടങ്ങളിലായാണ് 300 കിടക്കകളുള്ള രണ്ട് പ്രാഥമിക ചികിത്സാ കേന്ദ്രങ്ങള് ഒരുക്കുന്നത്. ലേഡീസ് ഹോസ്റ്റലില് 200 ഉം മെന്സ് ഹോസ്റ്റലില് 100ഉം ബെഡ്ഡുകളുണ്ടാകും.
18ന് രണ്ട് ചികിത്സാകേന്ദ്രങ്ങളും തുറന്നുപ്രവര്ത്തിക്കുമെന്ന് ഡെപ്യൂട്ടി ഡിഎംഒ ഡോ. ജയശങ്കര് പറഞ്ഞു. കൂടാതെ എംസിഎംഎം ആശുപത്രിയില് ഡോക്ടര്മാര്ക്കും മറ്റ് സ്റ്റാഫുകള്ക്കുമടക്കം താമസിക്കുവാനും പിപിഇ കിറ്റുകള് അടക്കമുള്ളവ സൂക്ഷിക്കാനും 28 മുറികള് സജ്ജമാക്കി.
വാളകം മേഴ്സി ഹോസ്പിറ്റലില് 100 രോഗികള്ക്കുള്ള പ്രാഥമിക ചികിത്സാകേന്ദ്രമാണ് പ്രവര്ത്തിക്കുന്നത്. 58 രോഗികള് അവിടെ ചികിത്സയിലുണ്ട്. നെടുമ്പന സാമൂഹിക ആരോഗ്യ കേന്ദ്രം(പഴയ ടി ബി ഹോസ്പിറ്റല്) പൂര്ണ സജ്ജമാണ്. മീയണ്ണൂര് അസീസിയ മെഡിക്കല് കോളേജ്(നഴ്സിംഗ് സ്കൂള് ഹോസ്റ്റല്), വിളക്കുടി ലിറ്റില് ഫ്ളവര് ഹോസ്പിറ്റല്, കൊല്ലം ആശ്രാമം ന്യൂ ഹോക്കി സ്റ്റേഡിയം എന്നിവ 17ന് പ്രവര്ത്തനം ആരംഭിക്കും.
ശാസ്താംകോട്ട, പോരുവഴി എന്നിവിടങ്ങള് പ്രത്യേക നിരീക്ഷണ മേഖലകളായി പ്രഖ്യാപിച്ചതിനാല് കര്ശന നിയന്ത്രണങ്ങളാണ് ഏര്പ്പെടുത്തിയിരിക്കുന്നത്. ഈ മേഖലകളില് പൊതുജനങ്ങള്ക്ക് ആവശ്യമായ ഭക്ഷ്യധാന്യങ്ങള് എത്തിക്കുന്നതിനായി ത്രിവേണി മൊബൈല്യൂണിറ്റുകളുടെ പ്രവര്ത്തനം തുടങ്ങാനും റോഡുകള് അടയ്ക്കുവാനും ശാസ്താംകോട്ട പഞ്ചായത്തില് ചേര്ന്ന വകുപ്പുതല ഉദ്യോഗസ്ഥരുടെയും ജനപ്രതിനിധികളുടെയും ഉന്നതതല യോഗത്തില് തീരുമാനമായി.
