കോട്ടയം : ദേവസ്വം ബോര്ഡ് പ്രസിഡന്റും കമ്മീഷണറുമായി അഭിപ്രായ വ്യത്യാസങ്ങളൊന്നുമില്ലെന്ന് മന്ത്രി കടകംപള്ളി സുരേന്ദ്രന്. നിലവില് ദേവസ്വം ബോര്ഡ് പ്രസിഡന്റിനെ മാറ്റേണ്ട സാഹചര്യം ഇല്ലെന്നും മന്ത്രി പറഞ്ഞു. ഇന്നലെ മാധ്യമ പ്രവര്ത്തകരുമായി സംസാരിക്കുകയായിരുന്നു അദ്ദേഹം.
ബോര്ഡ് പ്രസിഡന്റും കമ്മീഷണറുമായി വ്യാഴാഴ്ച ചര്ച്ച നടത്തിയിരുന്നതാണ്. എന്നാല് ശബരിമല വിഷയത്തില് ഇപ്പോള് പുനപ്പരിശോധനാ ഹര്ജിയാണ് പരിഗണിക്കുന്നത്. സാവകാശ ഹര്ജിക്ക് ഇനി പ്രസക്തിയല്ലെന്നും കടകംപള്ളി കൂട്ടിച്ചേര്ത്തു.
ശബരിമല യുവതീ പ്രവേശന വിധിയില് പുനപ്പരിശോധന ആവശ്യമില്ലെന്ന സുപ്രീംകോടതിയിലെ ദേവസ്വം ബോര്ഡിന്റെ നിലപാട് തന്നോട് ആലോചിക്കാതെയാണെന്ന പ്രസിഡന്റ് എ. പദ്മകുമാര് കഴിഞ്ഞ ദിവസം അറിയിച്ചതോടെയാണ് വിവാദങ്ങള്ക്ക് തുടക്കമായത്. ദേവസം ബോര്ഡ് കമ്മീഷണര് എന്. വാസു തന്നോട് ആലോചിക്കാതെയാണ് ഈ നിലപാട് എടുത്തതെന്ന് പദ്മകുമാര് പരസ്യ പ്രസ്താവന നടത്തുകയും ചെയ്തിരുന്നു.
എന്നാല് ബോര്ഡ് സുപ്രീംകോടതിയില് എടുത്ത നിലപാടില് തന്നോട് ആരും വിശദീകരണം തേടിയിട്ടില്ലെന്ന് വാസു അറിയിച്ചു. ദേവസ്വം ബോര്ഡ് പ്രസിഡന്റ് ഒരു പൊളിറ്റിക്കല് നോമിനിയാണ്. എകെജി സെന്ററിലെത്തി ഇതുസംബന്ധിച്ചുള്ള അതൃപ്തിയും ദേവസ്വം ബോര്ഡിലെ ചില തീരുമാനങ്ങളിലുള്ള വിയോജിപ്പും കോടിയേരി ബാലകൃഷ്ണനെ അറിയിച്ചിട്ടുണ്ടെന്നും വാസു പറഞ്ഞു.
