ലക്നൗ: പ്രധാനമന്ത്രി നരേന്ദ്രമോദിക്കെതിരായ അപകീര്‍ത്തികരമായ ട്വീറ്റിന്റെ പേരില്‍ കോണ്‍ഗ്രസിന്റെ സമൂഹമാധ്യമം മേധാവിയും പാര്‍ട്ടി മുന്‍ എംപിയും നടിയുമായ രമ്യ(ദിവ്യ സ്പന്ദന)യ്‌ക്കെതിരെ കേസ്.
മോദിയുടെ ഫോട്ടോഷോപ്പ് ചെയ്ത ഫോട്ടോയാണ് ദിവ്യ സ്പന്ദന ട്വീറ്റ് ചെയ്തത്. ഫോട്ടോയില്‍ മോദി തന്റെ മെഴുക് പ്രതിമയുടെ നെറ്റിയില്‍ കള്ളന്‍ എന്നെഴുതിയിരിക്കുന്നു. ‘കള്ളന്‍ പ്രധാനമന്ത്രി മിണ്ടരുത്’ എന്ന ഹാഷ് ടാഗിനൊപ്പമാണ് ഫോട്ടോ ഷെയര്‍ ചെയ്തത്.
ലക്നൗ സ്വദേശിയായ അഭിഭാഷകന്‍ സയീദ് റിസ്വാന്‍ അഹമ്മദിന്റെ പരിതായില്‍ ഐടി നിയമം സെക്ഷന്‍ 67-ഉം ഇന്ത്യന്‍ ശിക്ഷാനിയമം വകുപ്പ് 124 പ്രകാരവുമാണ് പോലീസ് കേസ് രജിസ്റ്റര്‍ ചെയ്തിരിക്കുന്നത്. അഭിഭാഷകന്‍ പ്രഥമ വിവര റിപ്പോര്‍ട്ടിന്റെ(എഫ്ഐആര്‍) പകര്‍പ്പ് ട്വീറ്റ് ചെയ്തിട്ടുണ്ട്. പ്രധാനമന്ത്രിയുടെ നിയമകാര്യസംഘം കൂടുതല്‍ ക്രിയാത്മകമാകണമെന്നും അദ്ദേഹം ആവശ്യപ്പെട്ടു.
ട്വീറ്റ് പിന്‍വലിക്കാനുള്ള തന്റെ ആവശ്യം തള്ളിയതിനെ തുടര്‍ന്നാണ് പോലീസില്‍ പരാതില്‍ നല്‍കിയതെന്ന് പരാതിക്കാരന്‍ പറഞ്ഞു. ഇത് ഇന്ത്യയുടെ റിപ്പബ്ലിക്കിനെതിരെയും പ്രധാനമന്ത്രിക്കെതിരെയുമുള്ള ആക്രമണമാണെന്ന് അദ്ദേഹം കൂട്ടിച്ചേര്‍ത്തു.
