ശ്രീകണ്ഠപുരം: ചിത്രശലഭങ്ങളെ അടുത്തറിയാന് കൈപ്പുസ്തകമൊരുക്കി ശ്രീകണ്ഠപുരം ഹയര് സെക്കന്ററി സ്കൂളിലെ ജൈവവൈവിധ്യ ക്ലബ്. കോട്ടൂരില് കുട്ടികള് നട്ടുവളര്ത്തിയ ജൈവവൈവിധ്യ ഉദ്യാനത്തിലെ ശലഭങ്ങളെ നിരീക്ഷിച്ചാണ് കൈപ്പുസ്തകം തയ്യാറാക്കിയത്. ഈ പാര്ക്കില് നിന്ന് നിരീക്ഷിച്ചു രേഖപ്പെടുത്തിയ 89 ചിത്രശലഭങ്ങളെ സംബന്ധിച്ചുള്ള വിവരങ്ങളാണ് പുസ്തകത്തിലുള്ളത്. ഓരോ ശലഭത്തിന്റെയും വര്ണചിത്രം, മലയാളത്തിലും ഇംഗ്ലീഷിലുമുള്ള അവയുടെ പേര്, ശാസ്ത്രീയ നാമം, ആദ്യമായി ശലഭത്തെ വിവരിച്ച ശാസ്ത്രജ്ഞന്, വര്ഷം, ശലഭത്തിന്റെ ലാര്വ ഭക്ഷണമാകുന്ന സസ്യങ്ങള്, അവയുടെ ശാസ്ത്രീയ നാമം, പൂമ്പാറ്റകളുടെ ഐയുസിഐ സ്റ്റാറ്റസ് എന്നീ വിവരങ്ങള് പുസ്തകത്തില് ഉള്പ്പെടുത്തിയിട്ടുണ്ട്. കൂടാതെ ജൈവ വൈവിധ്യ ബോര്ഡ് ജില്ലാ കോ-ഓര്ഡിനേറ്റര് വി.സി ബാലകൃഷ്ണന് എഴുതിയ ‘ശലഭോദ്യാനങ്ങള് എങ്ങനെ വളര്ത്തിയെടുക്കാം’ എന്ന ലേഖനവും ചിത്രശലഭങ്ങളുടെ ജീവിതചക്രം, ജീവിത രീതി എന്നിവയെ സംബന്ധിച്ച് ശലഭ നിരീക്ഷകനായ ഗിരീഷ് മോഹന് എഴുതിയ ലേഖനവും പുസ്തത്തിലുണ്ട്. ജൈവവൈവിധ്യ ക്ലബ് കോഓര്ഡിനേറ്റര് ടി.എം.രാജേന്ദ്രന്റെ നേതൃത്വത്തില് വിദ്യാര്ത്ഥികളായ ജി.എം.ഹൃദ്യ, എം. നവനീത, മീനു രാജേന്ദ്രന്, കെ.പ്രണവ്, വി.വി.അഭിനന്ദ് എന്നിവര് ചേര്ന്നാണ് പുസ്തകം തയ്യാറാക്കിയത്.
സംസ്ഥാന ജൈവവൈവിധ്യ ബോര്ഡിന്റെ ധനസഹായത്തോടെ തയ്യാറാക്കിയ പുസ്തകം ജില്ലയിലെ മുഴുവന് പൊതുവിദ്യാലയങ്ങള്ക്കും സൗജന്യമായി നല്കും. പുസ്തകത്തിന്റെ പ്രകാശനം വെള്ളിയാഴ്ച രാവിലെ 10 മണിക്ക് ശ്രീകണ്ഠപുരം കമ്മ്യൂണിറ്റി ഹാളില് വനം, മൃഗസംരക്ഷണ വകുപ്പ് മന്ത്രിമന്ത്രി കെ.രാജു നിര്വഹിക്കും.
